U Symbood Montri Rangbah ka jylla wa pait leh ya ka chnat PWD (Roads), u Prestone Tynsong da ong u wa ka sorkar da ekti ko cha ki bor pynlai District, nadooh ki Deputy Commissioner wa ki Superintendent of Police yong ka East Khasi Hills wa Ri Bhoi District wow pait, wow sonteri ya ka yingkieñ ha Umiam khnang wa ki kari ym lai ki palat ya ka 20 Metric Ton.
Dang ini wadep da sakhi wa em i lai laitlan ki truck deiwa kit deiwa khia lyngba ka yingkieñ Umiam, khlem da em kiwa pait næ yang ya katai ka yingkieñ wot hadien wa ka Meghalaya High Court da pynmih hukum ko wym chah de wow lai ki kari kiwa kit palat 20 Metric Ton.
Hawa kylli ynne ka sngi, u Prestone da ong u wa ka sorkar da phah ko ya ki bor District wow booh ya kiwa pait ha waroh arliang ka yingkieñ waroh 24 kynta khnang wym em wa kit palatpood, neibhah wa hadien wa da yoh ya ka hukum na ka High Court, neiliang ki chnat sorkar nadooh ki bor District, ka chnat Transport, ka PWD ka MeECL da pynmih ki leh yei pynbna wa ym toh u lai palat 20 Metric Ton na katai ka yingkieñ kawa da sdang wow tlot.
Hawa kylli, neiliang u Prestone da pynksan u wa u em bait ki bru waroh 24 kynta ha katai ka yingkieñ wow pait wei da ong u leh wa lada em i tkoh, ka sorkar daw phah biang ko ya ki pulit wa ki bor pynlai District wow leh ya iwa emkaam neibynta wow yada ya katai ka yingkieñ.
