U Montri Rangbah ka jylla, u Conrad Kongal Sangma uwa ksoh leh ya ka chnat muna poisa ka jylla, Ynne i sngi da wanrah u ya ka mang poisa yong u snem 2021-22, kawa yoh lum dan man ko wa duna T. 1,570 klur na i pynlut, iwa kynjoh 4.07% na ka Gross State Domestic Product.
Hawa wanrah ya i mang poisa ynne ka sngi, u Conrad da ong u wa ka jylla yooluti ko wow yoh T. 15,262 klur ha u snem mang poisa wow wan, katwa i lut won da kynjoh i cha ka T. 17,603 klur, wei i su ram ha u snem 2021-2022 u man i T. 1,047 klur.
U Conrad da ong u wa i pynku ya i e bhah na ka sorkar pyrdi ya ka jylla daw yarap i chiboon heiyatoh wa i emkaam ka jylla neibynta ki kaam pynroi.
Ha ka mang tanka u snem 2021-22, u Montri Rangbah da ong u wa ka sorkar da kyruiñ ko cha i chait i khiah, i puræ puthi wa i rep i riang wei da man T. 820 klur du neibynta i chait i khiah.
Hajrong i puræ puthi, u Conrad da ong u wa i mang Tanka wa T. 980 klur toh wow chna ya ki College wa ki skur wei wow pynjanai ya kiwa da em chwa.
Da ong u leh wa neibynta i rep da mang wow pynlut ha u snem 2021-22 hadooh T. 559 klur, wei ini man i wow pynchlur ya ki warep lyngba ki Mission waphær waphær, kam hei wow rep Tit, Chyrmit Lakadong, Sachram wa kiwi kiwi.
Heiyatoh wa kiwi ki kaam pynroi, kam hei chna sarok ha ka jylla, u Conrad da ong u wa da mang T. 1080 klur neibynta ka chnat PWD, T. 802 klur neibynta ka chnat PHE, wei da mang leh T. 2491 klur neibynta kiwi ki kaam pynroi hapoh ka jylla.
