U MLA ka Congress na Rangsakona, u Zenith M Sangma ynne ka sngi da pynksan u wa ka sorkar wa yalam da ka Congress ha u snem 2007 da soi ko ya ka soskular wa ka National Thermal Power Corporation kamwa da leh lang da kiwi ki jylla ka North East ha itu i por, wei da pynsñiaw u leh yei lyngngoh ya i jubab wa da e da u Montri Rangbah ynnin ka sngi deiwa ong wa da klam u khlem i kitkhlieh.
Hawa pynksan ynne ka sngi, u Zenith da paan u leh ya ka soskular wa da yasoi ha u snem 2007 yow pynbait neibhah wa u Montri Rangbah da yahbakla u ya ka yung dorbar, deiwa ong wa u Montri Rangbah ym ye du wow pynbaad, neibhah ha itu i por man ko kawa emkaam wow ya soi ya ka Power Purchase Agreement (PPA) da waroh ki jylla ka North East, wei ym em itæ ha i thoh wa hap wow booh dor ‘Fix Charge’.
Da ong u wa ha u snem 2015 da pynkhamti ya ka NTPC, Bongoigoan wa ka Central Electricity Regulatory Commission, kiwa booh ya i dor, tangwa hawa chem wa i dor man i iwa heh, ka jylla da kyntait ko wow thied ya i bordiñ na ka NTPC, deiwa kam u leh wa ka sorkar ha itu i por da yakhun wei rah ya katai ka phang wa ka sorkar India wei ym em su chi ana leh.
U MLA ka liang pyrchah da ong u wa i eh da mih ha ka 1 tarik u Naisaphar 2019 hadien wa ka sorkar India da phah ko wa hap su chwa neibynta wow thied ya i bordiñ da ka Discoms, wei toh hajrong katai ka yurim wa hap wow ya kular da ka Letter of Credit (LC) wa kiwa saam bordiñ iwa man i su katkam ka PPA.
