Ka seiñ Jaiñtia Students Movement (JSM) ynnin ka 18 tarik da e dorkhat ko ha u montri ki kaam pohyung ka jylla heiyatoh wa i chah tynyap ki ar ngut ki khynnah kynthai ha East Jaiñtia Hills District du hapoh 90 sngi wei hadooh ynnne ka sngi ki pulit ympu chemdien ki ya kiwa emkti ha ini i kaam.
Da kdaw ko yeiwa jia ha ka 16/17 tarik u Kmaichonglad 2020, heiwa da chah slaitbor wei chah tynyap kawi ka khynnah wa 18 snem wei da chem ya i metyap yong ka na iwi i thaw wa haap hapoh ka Lad Rymbai Police Outpost, East Jaiñtia Hills District.
Chooh chooh da kdaw ko yeiwa jia ha ka 12/13 tarik uni u bnai heiwa da chah tynyap kawi ka khynnah kawa 17 snem wei da chem ya ka na Ar Kilo iwa haap hapoh ka Khliehriat Police Station, East Jaiñtia Hills District.
Ka JSM da kdaw ko wa na ini i jia da wanrah i yei sy’ir mynsien ki paidbah ka District khamtam ki kynthai wa khynnah neibhah hadooh katni ym em u ye ki pulit wow kem ya kiwa emkti.
Katwa kamtæ ka seiñ da dawa ko wow ekti u takit ya kini ki kaam da ka Central Bureau of Investigation, wow thung ya ka sahep kynthai ha i kyrdan Deputy Superintendent of Police hapoh ka District ka wow pait wei wow takit du ya ki kaam wa man pyrchah ya ki kynthai wa ki khynnah.
Heijooh i por ka seiñ da dawa ko wow thung noh da ka Crime Scene Investigation Unit ha waroh ki District Police Headquarter ka jylla wei wow thung kawi ka sahep kynthai kawa em i kyrdan Sub-Inspector kawa em jar jiar ki kamra wa thaw psiah ha ki Police Outpost/Police Station ha ka jylla.
Neidaw wa man i kaam wa khia, neiliang ka seiñ da booh por ko hadooh 30 Naitung (April), 2021 wow e yeiwa dawa lym kamtæ daw pynman noh ko dei yakhih.
