Ynne ka sngi da man ko ka sngi wa khroo ya ki tre kari TATA ha West Jaiñtia Hills neibhah wa ynne ka sngi da wai ya ka TATA Authorised Service Station (TASS) kawa pura wei kawa nyngkong dooh ha ka District.
Kani ka TASS toh kawa hapoh i pait i yoo ka M/S MH & Sons Enterprise ka yong ki ar ngut ki chi kurim, u Marbait Iakai wa ka Turoi Kyndait kiwa da sdang ya i khih wa yatoh wa ki kari da boon snem bha kattu.
Hapoh jylla da em soo tylli ki TASS wei kani ka thaw em ko harood u sarokbah NH6 ha Phramer, West Jaiñtia Hills.
Ya kani ka TASS da sdang chna nadooh u snem 2019 tangwa neidaw wa em ka khlam COVID-19 da thut i kreh, tangwa da ye won wow wai ya ka ynne ka sngi.
Ha kani ka sngi da em ka yalang wa tbian wa pynlai da u Aloysius Papang.
U ADC ka West Jaiñtia Hills District u L. Kynjing hawa e yei klam kam u kongsan da ong u wa i em kani ka thaw daw pynsuk bha ko ya ki paidbah lada sih ka kari ki neibhah kattu ym emkaam de ki wow lai cha Shillong wei da ye ki wow chna ya ka kari ki pyn heini, deiwa kyrmen leh daw ye ko u thung kreh ya ki khynroo khyllood ka District.
U Arjun Jalali uwa man kam u Field Services Head Domestic hawa e yei klam da ong u wa i thmu yong kini ki thaw chna kari ka TATA toh wow pyndep ya i emkaam ki bru hapoh 2 kynta donhi deiwa yaroh leh ya i rukom wa da chna ya kani ka thaw neibhah wa da biang lut ko nadong chadong wow leh yeiwa emkaam ki paidbah.
Da ong u leh wa hapoh ka ri em 1500 tylli kam kini TASS wei kyrmen skem u leh wa daw ye ko u e ya i chakri ya ki paidbah ka thaaiñ kiwa wan emkaam ha ka.
Da pynphooh leh ya kani ka yalang da ki rwai wa ki chaad.
