Kamwa ha kylleiñ ki thaw da leh warom yaka World Water Day ynnin ka sngi hajrong ka phang “Valuing Water”, neiliang ka yung krehkaam yong ka Krishi Vigyan Kendra (KVK), Jaiñtia Hills, Jowai leh da leh warom ko ynnin ka sngi ha Jowai Horticulture Hub, Thadlaskeiñ deiwa emlang nadooh ki warep wa ki bru na ki chnat krehkaam sorkar waphær waphær.
Haka yalang wa pynlai daka R. Lyngdoh, SMS (Agronomy), u Senior Head & Scientist yong ka KVK, u Dr. D. Pasweth, hawa e yei klam pdiang da pynsñiaw haroh u hajrong i emkaam ka um khamtam ha kini ki sngi wa haki thaw sor ki um ki wah wym man chngaaiñ de wow pynemkaam ki neidaw wa da joor i tngit.
Ka S. Kynjing, ADA District Agriculture Office da ban joor haroh ko hajrong i emkaam ka um neibynta ki warep wei kyntu ko wow kiar nei pam dieñ pathar, i tih moo wa kiwi wa ye u ktah yaka um.
U J. Kharmawphlang, DPD ka ATMA, West Jaiñtia Hills da klam u hajrong ki laad wow yada yaka um, najrong wa kdaw u leh yaki um ki wah kiwa da chah ktah haka jylla wa da yoo emkaam wow pynkhooid.
Neitæ kyntu haroh u ya ki warep wow man kiwa tip u pynlang um-slap lyngba ka rukom wa tip kam ka Rainwater Harvesting.
Haka e sikai namo ka Technical Session yong kani ka sngi won da yoh yei klam na ka R. Lyngdoh, SMS (Agronomy) hajrong ka phang “Water Conserving Technique in Agriculture”. Hajrong ka phang ‘’Farmers’ Awareness Programme on District Agro-Meteorological Unit (DAMU) and its importance’’ da klam da ka E. Jyrwa, SMS (Agro-meteorology).
Da pynsñiawthooh haroh ko ya ki warep wa kammon u tip chwa ki yei man i long ka suiñbneng lyngba ka App, “MEGHDOOT” khnang yow yoh yutip chwa ki yei man ka suiñbneng neibynta u leh ki yeiwa emkaam hei rep i riang.
Yaka yalang da pynkut dei klam e khublei naka B. Kharbamon.
