Ka National People’s Youth Front (NPYF) kawa man ka chnat khynroo ka National People’s Party (NPP), ynne ka sngi da beiñ ko ya u General Secretary ka United Democratic Party (UDP), u Dr. Jemino Mawthoh hajrong i dawa wow knieh noh ya ka chnat bordiñ na u James PK Sangma.
Hawa klam ynne ka sngi, u Nicky Nongkhlaw uwa man u Working President ka NPYF da ong u wa u Jemino uwa tip wa ka sorkar thooh ko ki laad wow pynwiar noh yei eh ha ka chnat bordiñ, da chim kabu wow dawa hiar chuki ya u Montri deiwa thoh ya ka chithi cha u Montri Rangbah ka jylla.
Da ong wow dawa hiar chuki ya uwon uwon u Montri ym wanrah ko ya i jubab yong i eh, deiwa pynksan wa toh lyngba i chimkhia yong u Montri Rangbah wa u Montri wa toh u pait da ye wow pynbien ya ka NEEPCO wow dam noh ya i pyndooh bordiñ ha ka jylla.
U Nongkhlaw da ong u wa u Jemino ym em de man u u bru wa yoo khmat ki bru hadien wa rem u ha ka Election MLA ha u snem 2018 neidaw ki kaam baam-tooh yong oo, wei da rem u leh ha ka Election MP ha u snem 2019. Chooh chooh da ong wa u Jemino da i thmu wow yoh biang ya i chaniah na ki paidbah neibynta ka Election 2023, wei syndet da leh u ya ini yow yoh u poi biang ha i bor.
Hawa kylli wa kam uwa yahkhmat ka UDP ya katai ka chithi leh da phah ha i pyrtuid ka Party, neiliang u Nongkhlaw da ong u wa ym em i yaklam wa kiwi kiwa yalam ka UDP næ na u President, tangwa ka chithi da phah cha u Montri Rangbah toh deiwa leh samen u Dr. Jemino.
Da ong u leh wa ka UDP leh emlang ko ha ka sorkar wei lada em iyi iyi, toh u rah ha ka Coordination Committee yong ka sorkar MDA wow yaklam deiwa kylli leh wa ileh ym klam u ya kiwi ki phang.