Iwi na ki thaw uiñke suwari wa da sdang pawnaam ha Ri-loom Jaiñtia iwa tip kam i Sahksaw wa em hapoh ka Dorbar Chnong Cham Cham, EJH; heiwa ha ini i thaw lai ke toh iwa em leh yaka Sahksaw Fish Sanctuary, ka Skha Thwai Marang Beach wei kawa em leh ka kchaaid Rynji cha wah, da chah ktah i hei joor u slap nadooh ynnin ka sngi.
Ynne ka sngi i pteiñ u slap wa joor da wanrah i yei chlai um wa joor bha ka wah Myntdu iwa da tymmoh lut ya ki bynta wa khriñ ya kiwa wan uiñke suwari kiwa da chna pynmiat da kiwa pynlai ya kani ka thaw wei da chah rah leh kiwi ki tiar ki tar wa da booh kyrpang ha ini i thaw kiwa da booh yow pynmiat dur ya ini i thaw.
Neiliang kiwa pynlai ya kani ka thaw da ong ki wa i dooh nong toh iwa khroo bha heiwa da chah rah lut waroh kiwa da pynlut por ki wow booh wow chna ha ini i thaw yow pyn ka-it kasar ya kiwa wan uiñke.
Kam wow pynkynmoo wa ha u Khonchonglad (Nov) 2020, da wan pait leh ya ini i thaw da u Montri Rangbah ka jylla u Conrad Sangma yow yarap poisa wow pynman ya ini i thaw kam iwi na ki thaw uiñke suwari wa pawnaam na chibynta ka poisa wa yoh naka New Development Bank.
