U President ka Coordination Committee of Registered MeECL (Employees) Association & Unions (CCORMAU), u PK Shullet da pyntip u wa ha ka 15 tarik u Duyatra (Jan) uni u snem, ka Engineer da chem nyngkong ko ya i tooh bordiñ kawi ka karkhana kawa em ha Byrnihat, Ri-Bhoi District, wei da ujor FIR ko wut wut hajrong itai i kaam tooh, heiwa da daiñ kuna leh ya katai ka karkhana kawa tip kam ka M/s Sai Prakash Industries hadooh T. 3.48 klur, tangwa katai ka karkhana da mynjur ko wow su ya ka kuna kamtæ da pyndam noh ya ka FIR, wei hadien 10 sngi u CMD, u Arunkumar Kembhavi da lai pait biang u cha katai ka thaw wei ya katai ka kuna leh da pynhiar da u CMD hadooh 50%.
Neiliang kiwa yahkhmat ka Union da pynsñiaw ki wa ym yada næ yachah ki ya ki sahep kiwa emkti ha kiwon kiwon ki kaam tooh wei da dawa wow em da ka takit wa laitlooid, heiwa da ong ki wa hajrong i wym su ki thaw sorkar ya ka bai bordiñ, ki wakreh ka chnat da jooh lai ah ki ya i bordiñ, tangwa hap ki wow yoh bor yoh mynjur chwa na ki bor wa haneiñ.
Kiwa yahkhmat ka CCORMAU da dawa ki na u Montri Rangbah ka jylla wow thung da ka kynhun takit wa laitlooid hajrong ki kynrum kynram wa da mih ha ka chnat MeECL, wei hajrong ini da dawa leh wa toh u pyndam noh chwa ya u James K Sangma kam u Montri ka chnat Bordiñ, wei kamjooh wow thung ya u Chairman cum Managing Director da ki sahep wym duna ya ka kyrdan Additional Chief Secretary.
Neiliang ki Engineer ka MeECL da e por ki leh ya ka sorkar wow pynmankaam ya itai i dawa hapoh ka 26 tarik uni u bnai wei lym kamtæ, ka CCORMAU daw pynman ko da ka yakhih.
