U montri rangbah ka jylla, u Conrad K Sangma, ynne da booddien u yei man i long ka khlam COVID-19 hapoh ki District ka jylla lyngba ka Video Conference wa ki Deputy Commissioner kamjooh ki sahep ka chnat i chait i khiah.
U Conrad da ong u wa i man i long hapoh jylla man i iwa sñiawkhia khamtam wa ku kiwa yoh COVID-19 hapoh jylla man-ka-sngi wei emkaam wow leh yeiwa emkaam khnang wow khang yei poor kani ka khlam.
“Emkaam wow chimkhia i khnang wow lait u man kam ha Delhi wa Mumbai deiwa bood ya ki kyndon yada na u COVID-19 wei wow chim ya i dawai yada na uni u khñiang,” da ong u Conrad deiwa pynrap wa ki paidbah ymtoh u kheiñstiñ ki yeini.
Da kyntait u wow pynkrehkaam ya ka Lockdown deiwa ong wa emkaam u pynduna ya ki kyndon wa ktah ya i khayi pateiñ ki bru wei emkaam leh wow man kiwa chngaaiñ.
Da pyntip u wa ka jylla man ko kawa duna bha kiwa chim ya i dawai yada COVID wei ka sorkar daw chimkhia ko wow pynchlur ya ki bru wow chim ki ya ini i dawai ha ki 10 sngi wow wan.
“Da booh thong wow e ya i dawai cha ki 6.5 lak ngut katkam wa ye ki u yoh ya ini i dawai ha kini ki 7 sngi deiwa pait ya i rta wa i man synjor i chait i khiah ki bru,” da ong u Conrad.
Da kyntu u ya ki paidbah wow wan ki chaphrang wow chim ya i dawai deiwa kyrpaad ya ki Dorbar Chnong, ki Waheh Chnong, ki heh na ki seiñ niam wa kiwi kiwi wow pynsñiawthooh paidbah ki yei emkaam wow chim ya ini i dawai.
U Conrad da ong u leh wa i dawai toh iwa miat wei iwa bha hanla em ki bru kiwa ye u chah ktah malu mala hadien wa yoh dawai tangwa ym man ki kiwa chitom wei u man ki kiwa khlan hi. Da ong u leh wa hap hi wow bood ya ki kyndon yada hadien wa yoh yei dawai.
Ha kani ka sngi da lai pait u leh ya ki thaw e dawai ha Shillong wei da yaklam u leh wa ki bru kiwa yoh ya ini i dawai yow pyndooh yei tieñ u chim ya ini i dawai.
