Ka Marwari Society da booh ko yei tyrwa ha ka sorkar jylla wow booh kawi ka Corona Care Center ha Cantonment Keating Road Shillong, kam chibynta wow yarap ya ka jylla ha i yakhun ya u khñiang COVID-19 uwa da sdang wow ku smat ha ka jylla.
U AL Hek uwa man u Montri ka chnat i chait i khiah ha ka jylla, da pyntip u wa ka Marwari Society daw booh ko ya kawi ka Corona Care Center kawa em 25 tylli ki pyllong ha ka skur Balika kawa em ha Keating Road wei katai ka Society da kular ko leh wow pynbiang wot ya i baam neibynta kiwa chah sumaar.
Da pyntip u wa ya itai i thmu daw sdang noh katni, heiwa da pyntip u leh wa ka sorkar da kyntu ko ya ki wow pyndep noh ya i kaam wa sah khnang yow ye u yoh pynemkaam noh nadooh kani ka tayaw hi.
U Hek da pyntip u wa ka sorkar daw yarap ko ya katai ka Corona Care Center deiwa e wakreh kam ki Doctor wa ki Nurse iwa daw pait da ka chnat i chait i khiah yong ka jylla.
U Montri da pyntip u leh wa ha katai ka Corona Care Centre daw booh chwa du ya kitu kiwa chitom malu mala næ kiwa haap ha ka Category A wa B.
Katkam wa pyntip u Hek, ka jylla kattæ ym em duna ko ya ki thaw thiah ya kiwa yabi COVID-19, heiwa da pyntip u wa ki thaw wa da pynkhreh da ka sorkar em ki kamwa 1000 thawthiah, wei da pyntip u leh wa neiliang ka synjuk kiwa synchaar chnong daw booh ki 2 tylli ki Corona Care Center wa kynthup ya kawi ha Jaiaw wa kawi ha Laban.
