Ynne ka sngi ka sorkar jylla da pdiang ko wow pynkylla ya ka chnat ki pulit SF-10 deiwa pynkylla ya ka aiñ Meghalaya Special Force Amendment Rules, 2016 wei ya ini da ong u montri ki kaam pohyung ka jylla, u Lahkmen Rymbui uwa da pyntip leh wa i bor ka chnat SF-10 daw man noh i 1784 ngut heiwa katni da em 1387 ngut.
U Lahkmen da ong u wa da pynkylla ya ka aiñ ha i rukom wow em 905 ngut donhi ha ka SF-10 katwa kiwi won u kyrriah (Transfer) ya ki cha kiwi ki District næ ki Outpost, ki SDPO katkam wa emkaam ya ki deiwa ong leh wa ka dhab ki montri ka sorkar da pdiang ko yeini.
Hajrong wow pynkylla ya ka SF-10, u Lahkmen da ong u wa katkam wa man i long ha ka jylla waroh kawi neiliang ka chnat ki kaam pohyung da rai ko wow pynkhlan ya ki yung krehkaam wa khian yong ki chnat pulit deiwa pynboon bru ha kam ki Outpost, Police Station ki District.
Heijooh i por da ong u wa ki 482 ngut ki pulit ka SF-10 daw kyrriah noh ya ki cha kiwi ki District ka jylla deiwa pynkynmoo u leh wa ka chnat SF-10 da sdang ya ka ym du wow wanrah ya i chongsuk tangwa wow yarap leh hawa em iwon iwon i ktah wa mih na ki bor ka rymaw.
U Lahkmen da ong u leh wa ka chnat Disaster Management da em ko ya ki bru yong ka hi wei i duna ki kaam ki damok wa kieñ suloi ha ka jylla da emkaam leh wow pynkylla ya ka SF-10 khnang wow yoh myntoi u yoh yarap ki paidbah ha ki District waphær waphær.
Da pyntip u leh wa ki 905 ngut ki wow neh ha ka SF-10, 183 ngut u neh ki ha Headquarter, 361 ngut ha ka Eastern Range kawa daw chna ha 1st MLP Battalion Mawiong wei 361 ngut won ha Western Range ha 2nd MLP Battalion Goeragre, Tura.
