Ynne ka sngi neiliang u BDO ka Laskein Block, u Dr. Brightstar Langbang da khut pynman u da ka yalang ya kiwa kitkaam ki seiñbhalang wa kynthup ya ka JSU, JSM, HYC, FKJGP wa KSU kiwa em hapoh ka Block wow yaklam hajrong ka khlam COVID-19 wei kammon u yada nei yabi uni u khñiang hapyrdi ki bru.
Hakani ka sngi da emlang leh u Dr. E. Lytan, Medical & Health Officer, Laskein CHC uwa da pynsñiawthooh che chaphang ka kjut khlam COVID-19 wei i myntoi wow chim tika cha kiwa kitkaam kini ki seiñ.
Da em leh ka ya phyllu yumut wei i pynche hajrong ki bynta wa boon kiwa dang artatien kiwa chimbynta ha kani ka yalang wei neiliang kiwa kitkaam kini ki seiñ leh da kyntu ki wa ymtoh wow pynbor ya ki bru wow chim tika khlem i mon yong ki bru samen.
Heijooh i por leh ki seiñbhalang da pdiang ki u yakrehlang neibynta u yakhun ya kani ka khlam COVID-19 deiwa pynsñiawthooh ya ki dkhot yong ki kamjooh leh ya ki paidbah hajrong ki kyndon u yada na kani ka kjut heijooh i por u pynchlur ya ki bru wow wan chakhmat wow chim yei tika yada na uni u khñiang.
Neiliang u Dr. Brightstar Langbang da kyntu u ya kiwa kitkaam kini ki seiñ wow yakrehlang wow yada na uni u khñiang khlam deiwa yarap u pynsñiawthooh lang ki ya kiwa hayung hasem yong ki yei emkaam u chim tika yow yada nei ktah joor u COVID-19.
Da ban u leh wa ki kam kiwa kitkaam emkaam u wan ki chaphrang wow chim tika wow man ki leh kam ka nongmuna ya kiwa boon wa lang khnang u yoh yei yada na ka khlam khnang wow ye u im biang deiwa laitlooid kam ki por nachwa.
