Ynne ka sngi da pynman ya ka yalang wa khut ka sorkar lyngba ka chnat ki kaam pynroi sor wa ka Shillong Municipal Board (SMB) wa kiwa kitkaam chnong ka Mawlai chirup wa ka Seng Samla Mawlai Pyllun (SSMP) wow kyrriah noh ya i thaw noh-jhep na Marten chawi tawon.
Neiliang ka seiñ SSMP da ong ko wa ha ka yalang ynne ka sngi da emlang u montri ka sorkar jylla, u Sniawbhalang Dhar, u MLA ka Mawlai, u PT Sawkmie, u MDC u Teiborlang Pathaw, kiwa kitkaam ka Mawlai wa kiwa kitkaam ka SSMP.
Hadien ka yalang neiliang u President ka SSMP, u Samuel Biam da ong u wa i sma i tung wa mih na Marten ymtoh de iwa ktah du ya ki bru tangwa wot ya ki mrad leh kamjooh heiwa kattu la kamwa san snem ymyoo de ya ki syngkni wow wan ki ha Marten.
Da ong u wa neiliang ki paidbah ka Mawlai da kwah ki wow pyndam noh ya i eh i khoo wa mih na Marten heiwa da noh ya i jhep la kamwa 83 snem kattu, da ong u leh wa toh i kaamram ka sorkar kammon wow leh wow pynduna noh ya i jhep heiwa la kammon kammon hadooh 70% toh u lai tlep noh cha iwi i thaw wow pynduna ya i sma katwa dang thooh thaw chawi tawon neibynta ini i jooh i kaam.
