Ka sorkar jylla lyngba ka chnat Urban Affairs wa Shillong Municipal Board ynne ka sngi ha ka yalang wa kiwa kitkaam chnong ka Mawlai da chim ki ya ka rai wow thooh ya i thaw neibynta wow kyrriah noh ya ka Marten na chnong Mawïong, deiwa seiñ leh ya ka Joint Committee.
Hawa yaklam wa kiwa pathai khubor hadien ka yalang, u montri ka chnat pynroi sor wa SMB, u Sniawbhalang Dhar da ong u wa ya kani ka Committee daw khlieh da u CEO ka Shillong Municipal Board heiwa daw emlang ki heh ka Mawlai wa kynthup ya u MLA, MDC wa kiwa kitkaam chnong kamjooh leh kiwa kitkaam ka Seng Samla Mawlai Pyllun.
Chooh chooh da ong u wa da ekti ha ka Committee wow thooh smat ya i thaw noh jhep cha kiwi tawon ki thaw wei ka sorkar nadooh nachwa da pait ko ya ki kattu katni ki thaw tangwa emkaam ya i pynsñiaw paidbah chwa.
Ini i rai da mih i ynne ka sngi hadien wa pyrchah kiwa chong chnong ka Mawlai ya i noh-jhep ha Marten, heiwa neiliang ka SSMP da khang tala ko ya i thaw ha ka 21 tarik uni u bnai neidaw wym mano u montri wow ap yei ood i naam ki paidbah wa da chlai jhep ha Mawiong.
Hawa kylla hajrong i eh wow yoh ya i thaw chawi neidaw wa em i pyrchah ki paidbah, neiliang u Sñiawbhalang da ong u wa daw pynyoo da ki kaam heiyatoh wa i kyrriah ya ka Marten na Mawiong.
