Hadien i wym hun ki kynhun seiñbhalang ya i yaklam ya ka Inner Line Permit ha ka jylla wa u Montri Kaam Pohyung ka ri India, u Amit Shah ha i wan yong oo cha nongbah Shillong ha ka 24 tarik uni u bnai wa da dep, neiliang yong ki seiñbhalang da mih ki wow rah ya ki Placaard wei wow thoh leh ha ki kynroh kylleiñ ka jylla ya i dawa ILP, ‘We Want ILP’ wa ‘No ILP No Rest’.
Hawa yaklam wa u Montri Kaam Pohyung ka jylla, u Lahkmen Rymbui hajrong ini i pteiñ wow pynsñiaw wow dawa ILP na ki kynhun waphær waphær, da ong u wa ka ri India toh ka ri synchaar paidbah wei em ko leh u yong ka hi u pood, deiwa pynrap wa neiliang ka sorkar leh ka paitbniah ko ya iwon iwon i mih pyrchah wa ym toh wow wanrah yei pynthut yei chongsuk chong saaiñ. Da ong u wa ki pulit leh ki da paitbniah bha ki ya iwon iwon i jia wow pynneh ya ka chong suk chong saaiñ ha ka jylla.
Da ong u wa i dawa ya ka Inner Line Permit ym toh i dawa du da ki seiñbhalang, tangwa toh i dawa yong ka jylla waroh kawi, deiwa pynkynmoo wa ini i dawa ym toh de iwa thymme neibhah wot hapoh ka yung dorbar chna aiñ ka jylla da chim ki ya kawi ka rai wa ka jylla emkaam ko ya ka ILP.
U Rymbui da ong u wa ha ka sngi wa wan u Union Home Minister leh, ki seiñbhalang, ki seiñ saaiñpyrthai ka jylla wa ka kynhun Montri leh da yaklam ki da i jooh i sur hajrong ini i dawa, deiwa pynrap leh wa ka sorkar jylla toh u booddien ko ya ini i dawa wow pynyoh ya i angnood ki paidbah.
