U Symbood Montri Rangbah ka jylla uwa pait leh ya ka chnat i chait i khiah, u Prestone Tynsong da pyntip u ynne ka sngi wa ka sorkar da mynjur ko yei dor thymme ya kiwa chah sumaar na u COVID-19 hapoh ka Megha Health Insurance Scheme (MHIS) wei ini leh toh iwa krehkaam hapoh ki thaw sumaar ki yong ki bru samen.
Da pyntip u wa ynne da dep mynjur yei bai sumaar ya kiwa chitom kiwa em 5 bynta namo ki Category- 1) kitu kiwa pynthiah hapoh ki General Ward khlem da emkaam Oxygen, i dor man i T. 7000 chi sngi, 2) ya kiwa sah ha ki General Ward wa ka Oxygen u man ko T. 11,500 chi sngi, 3) ya kiwa thiah hapoh ki ICU-HDU khlem da pynemkaam ya ki kor Ventilator u man ko T. 14,000 chi sngi, 4) kiwa thiah hapoh ICU kiwa pynemkaam Ventilator kawa ym toh wa thap chapoh ch’oh u man ko T. 18,000 chi sngi 5) katwa kitu kiwa thiah hapoh ICU deiwa pynemkaam ya ki Ventilator kiwa hap thap chapoh ch’oh u man ko T. 20,000 chi sngi.
Ini i dor wa thymme toh kiwa daw krehkaam nadooh ka 15 tarik uni u Naisaphra.
U Prestone da pyntip u leh wa ka sorkar daw e yarap ko cha ki thaw sumaar ki bru samen yow pynkhlan ya ki ICU wa ki Oxygen Plant.
U Director of Health Services (MI), Dr. Aman War da pyntip u wa hapoh ka MHIS Scheme u su hadooh T. 2.8 lak uwi u bru katwa kiwa chah ktah chi yung u su T. 5 lak wei da kini ki dor thymme da yooluti wa ym hap de ki bru wow sai na kata yow su bai sumaar.
