Iwi i yung wa em ha chnong Kseh, Elaka Sumer da chah thang i ynne i step heipor kamwa 5:00 waje ha u bru wa tip kam u Well Pasleiñ wei ini i yung toh pyn i yong ka kurim u ka Jun Iakai kawa da em 4 ngut ki khon tangwa heipor wa jia ini ym em ki hapoh yung.
U Secretary ka chnong Kseh u Kner Dkhar da pyntip u wa ka yung ka sem kut wa em i maham u Well ya ki, ka Jun da jooh pyntip ko cha ka chnong wa cha ka VDP wei da boon boon sien da dep wow bichaar ya u Well wei ha ka bichaar wa khaddooh ya oo da ya soi ya ka soskular hapyrdi ka chnong, ka VDP wa u Well Pasleiñ wa lada dang chem biang wa man u u bru wa pynawri awra ha chong ha thaw wa hayung hasem, ka chnong u phah kset ko oo.
Hadien ini hadien kattu katni por manda wan u na i thaw dih thaw baam da pynawri biang u ha yung ha sem wei da beh u leh ya ka kurim wa ki khon ki kti kiwa da yut cha ka yung ka payu yong ki wei du kamwa hadien chi sngi wa sah ki heini, da wan u Well deiwa rah wait wow pynawri sa ha ini i yung.
Kamtæ sa chisien ka yung da kyrpaad ko ya ka chnong waka VDP wow kem ya u Well tangwa ym yoh wow kem ya oo heipor wa rah wait u, kamtæ heipor janmiet won da yoh wow kem oo da ki dkhot ka VDP wei da rah chapoh ka Dorbar Hall yow bichaar ya oo heiwa da chem toh wa da tyngkheiñ u ka ka soskular heiwa da li booh ya oo cha thanat tangwa hadien kattu katni por da yoh u wow mih noh.
Manda liwan u cha chnong, da chem u wa ym em de ki khon ki kti yong oo wa chong wa sah ha ka yung ha sem wei da thooh u ya ki cha ki thaw kreh thaw rep ki wei ym em chem u ki.
Hadien ini, kamwa chi tayaw da sah u ha yung samen, heiwa ynne i step da thang u yei yung.
Ka chnong da beiñ joor ko ya ini wa leh u Well Pasleiñ deiwa ong wa kam ka chnong ym kwah ko wow wan iwon iwon i huri hura i pynkulmar hapoh ka chnong wei ya uni ki bor ka aiñ toh u kem ya oo yow lait iwon iwon chooh i jia ym du ha ka chnong kamjooh ha kiwi ki chnong.
Neiliang ka EJNC – Sumer Circle leh da dawa ko pynchitom ya u Well Pasleiñ uwa da emkti wow thang ya i yung ka Jun Iakai.
