Ka seiñ STIEH lyngba ka President yong ka, ka Deiwi Tongper wa ka KSU Nartiang Circle lyngba u General Secretary, u Chanbor War da pyntip ki wa da booddien ki ya i kaam wa chah slaitbor ka khynnah wa dang 12 snem pyn ha u Pa-nah yong ka iwa da jia ha kawi na ki chnong wa haap hapoh ka Nartiang Police Station, West Jaiñtia Hills.
Neiliang ki ar seiñ da beiñ joor ki ya uni u bru uwa da 30 snem i rta uwa da slaitbor pyn ya ka khon yong oo kawa dang 12 snem i rta kat hadooh wa dap ko 14 snem kattu.
Katkam i yaklam wa kani ka khynnah wa kiwa hayung yong ka da ong ki wa uni u Pa-nah yong ka da sdang u ya ini i kaam nadooh u snem 2019 heipor wa kani ka khynnah dang em ko 12 snem wei da pteiñ u ya ini i kaam hadooh wa da dap ko 14 snem katni.
Kini ki ar seiñ da ong ki wa kani ka khynnah da khana ko yeiwa jia ha ka Bei ka yong ka yeiwa leh uni u Pa-nah ko ya ka tangwa ka Bei ymbien ko wow leh iwon iwon hajrong ini kat hadooh wa khana ko ha u Ma wa ya ka Beikhian yong ka heitæ da lai ujor ki ha Nartiang Police Station wei ki pulit da lai kem ki ya uni u bru.
Kini ki ar seiñ da dawa ki wow pynchitom joor ya uni u bru katkam ki kyndon ka aiñ POCSO Act wei kani ka khynnah toh u yoh ko ya i bichaar wa hok deiwa kset patok ya uni u bru (Pa-nah) chi rta khnang wa ki kaam thombor kam kini ymjia de ki neini chaphrang.
Heijooh i por ki ar seiñ da ong ki wa boonsien hi kam ini i chah slaitbor chah thombor jia i dei langær tangwa nei chong synjor ka aiñ, kiwa tyngkheiñ aiñ yoh ki wow uiñ laitlooid katwa ngait wei ini booh i hei maa ya kiwi tawon ki kynthai khynnah.
