Ka Secondary School ka chnong Mawkynsah, West Khasi Hills daw yoh myntoi ko kattu na ki e-Learning kiwa da sdang da ka sorkar India hadien wa da yoh ki ya ka Internet hapoh ka skur iwa daw wai ya ki laad wow yoh chiboon i kyrkhu hei stat i tip kamjooh wow rap yajan wa ka pyrthai waroh kawi.
Ini man ko kam chibynta ka lehkmen yoh laitlooid ka wa 75 snem ka ri kawa da e pyrtuid ha uni u snem ‘Azadi ka Amrit Mahotsav’, kamtæ neiliang ka Department of Telecom North-East LSA da wai ko ya ka Bharatnet Site ha chnong Mawkynsah heiwa da emlang u DDG (Rural), u Dilip Kumar, u DDG (Security), u R K Maheshwari deilang wa u wakreh ka BBNL, u Shamad Mahajan.
Neiliang u Headmaster ka skur, u Brailian Lyngdoh da pynsñiaw u yei kmen wa pynyoh ya ka Internet wa smat kawa da yarap bha ya ki khynnah skur.
Neiliang ka chnong da emlang u Waheh Chnong, u Banteilang Lyngdoh wa u Secretary Chnong, u Pynshainlang Nongrang.
Deiwa wai ya kani ka BharatNet Site ha Mawkynsah, ka Meghalaya da yoh ko sa kawi ka chnong kawa da yoh yei pyrthai ha pariam kti wei kam kini ki jooh ki VSAT Site daw lai pyndait sa ha ki 599 tylli ki chnong kam chibynta ka Phase-II ka BharatNet Project, heiwa da dep pyndait chwa ha ki 98 tylli ki chnong hapoh ka Phase-I. Ya kiwi ki chnong daw pyndait ha kawi won ka bynta (Phase) kani ka Project hadien wa sdang ya ka.
I thong kani toh wow e High-Speed Broadband cha 2.5 lakh tylli ki Dorbar Chnong ka ri, najrong ini ka Department of Telecom leh da kyrchaan poisa ko wow pyndait ya ki 4G Mobile Tower ha ki 1164 tylli ki chnong ki wym pu yoh 4G ha Meghalaya. I thong toh wow booh 878 tylli ki Tower yow poi cha kani ka thong heiwa 11 tylli ki Tower daw booh ha ki sarokbah ka jylla yow pynyoh ya ka Internet khlem thut.