Ynne ka sngi da pynman ya ka yalang ha Ialong, West Jaiñtia Hills heiwa u MLA ka Jowai, u Wailadmiki Shylla da ekti u ya ka Ambulance cha ka Dorbar Chnong Ialong.
Ya kani ka yalang da pynlai da u Jop Rymbai uwa da e leh ya ki kyntien pdiang burom ya kiwa em ha kani ka sngi.
Ha kani ka sngi u Bishar Shylla uwa man kam u Waheh Chnong warim ka Ialong da e khublei u ya u Wailadmiki wa da e u ya kani ka kari cha ka Dorbar Chnong neibhah kani ka kari ka wow chakri ya ka chnong da man ko kawa nyngkong dooh kam kani ka kari wa yoh ka chnong.
Da ong u wa u Wailadmiki da kular u ya ka Dorbar Chnong wei ynne ka sngi da man sakhiat itæ i kaam wa da kular u wei ynne ka sngi man ko kawa sah khana parom yanom. Da ngait skem u leh wa daw ye u pynmiat noh wot ya ki sarok leh hapoh ka chnong neibhah wa kani ka chnong man ko kawa da naam heiyatoh wa ki thaw uiñke suwari.
Neiliang u T. Ram Phawa uwa man u Waheh Chnong ka Ialong da ong u wa ini da man i iwa da angnood ki paidbah ka chnong iwa da slem wow yoh ya kani ka kari.
Da ong u wa man iwa sñiawsih wa ha ki snem wa dadep uwa mihkhmat ka Jowai, u Dr. RC Laloo ymye ware u wow yarap ya ka chnong na ki daw wymye u kiar tangwa katni da yoh ya u Wailadmiki uwa dang khynroo uwa da ye wow pynyoh biang ya i yarap wei da kyrmen skem u wa daw ye chooh u yoh yarap na oo sam chaphrang.
Chooh chooh da ong u wa kani ka kari ym mut ko du wow pynemkaam ha Ialong tangwa wot kiwi ki jan chnong leh ye ki u yoh yarap na kani ka Ambulance.
U Wailamiki Shylla hawa e yei klam da ong u wa i lai luti neibynta kani ka Ambulance da man i iwa da slem bha wei i ekhublei toh u lai i cha kiwa kitkaam ka chnong kiwa da booddien bha ya kani ka kari.
Da ong u wa hadien wa da duna ka khlam COVID-19 ymtoh de u khang yei lai i wan ki paidbah tangwa emkaam wow pynkhlan ya ki thaw sumaar neibhah lada pynjoor da i khang ki bru daw yap ki nei thngan.
Chooh chooh da ong u wa hawa pynemkaam ya kani ka kari ymtoh u chim yei dor wa heh kam kiwi tangwa ha i dor iwa biang wei ini daw ye u kyrchaan wei wa daw kynrong ko ya ka yarong poisa ka chnong deiwa kyntu ya ka Dorbar Chnong wow pynemkaam hok ya kani ka kari.
Ya kani ka sngi da pynphooh da i chaad wei da pynkut ya ka yalang da ki kyntien khublei na ka Shimti Pale.