I lai kynreh ki chipai ka Assam Rifles yei yung uwa jooh yalehbol ka Nagaland uwa tip kam u Roko Angami da pynchrai ko ya kiwa boon ha Kohima.
Ki chipai ka Assam Rifles da psiah yabor ki chapoh i yung u Roko hei step ka 29-10-21 iwa em ha Kohima.
U Roko toh uwa jooh man leh kam u President warim ka Nagaland Football Coaches’ Association (NFCA).
Neiliang ka Angami Youth Organisation (AYO), da beiñ joor ko ya ini wa leh ki chipai ka Assam Rifles iwa khlem da pyrkhat deiwa psiah yabor chapoh i yung u Roko.
Kamtæ da ong wa ini da pynyoo biang yei rukom leh kini ki chipai kiwa kynroi paidbah neibhah u Roko toh uwa emburom u bru u wym jooh em tyngkheiñ aiñ uwa nadooh ki por wa dang khynroo u da mihkhmat u ya ka ki Naga hapoh ka ri wei da jooh man u leh kam u Auditor General ka AYO nadooh u 2016 hadooh u 2019 wei u President ka Northern Angami Youth Organisation (NAYO).
Chooh chooh da ong wa ka Assam Rifles da psiah ki chapoh yung u Roko heipor wym em u hapoh yung wei ini da yoo lakam wa kwah u lute yei yung u hanla ki ktien im sngi ka Assam Rifles da ong ko “Friends of the hill people” namo ki lok ki jaitbru ri-loom.
Da ong leh wa ini i leh ka Assam Rifles da pynkynmoo biang yei chah pynchitom ki Naga ha ki snem wa da lai nadooh kiwa chah slaitbor, kiwa chah pynmynsoo wa kiwa chah pynyap ha ki chipai ka India. “Ini da wanrah biang ko yei wym em chaniah ki bru ya ki chipai,” da ban ka AYO.
Neiliang ka Zhadima Village Council iwa man leh i chnong tre u Roko da beiñ ki yeini i leh khlem pyrkhat ka Assam Rifles deiwa ong wa ini da man ko kam wow kynroi ya ki bru wa kwah u im dei suk sei saaiñ.
Ka Northern Angami Youth and Sports Association ‘C’ (NAYSA-C) leh da beiñ ko ya ini wa da jia ya u khloor yalehke ka jylla deiwa ong wa ka Assam Rifles da man ko kiwa choon ki jaitbru ri-loom.
