Ka Ministry of Petroleum & Natural Gas ka sorkar pyrdi da pyntip ko wa 25 tylli ki jylla deilang wa ki Union Territories da dep chim ki yei rai wow pynduna ya ka VAT wa da kheiñ hei Petrol wa Diesel yow pynstiñ yei yukit ki paidbah hadien wa ka sorkar India da pynhiar ko yei dan Petrol wa Diesel kawa tip kam ka Central Excise Duty da T. 5 yei Petrol wa T. 10 yei Diesel ha ka 3 tarik uni u bnai. Heiwa hadien ini kiwa boon ki jylla da pynhiar ki yei dan Petrol wa Diesel kawa da kheiñ hei dur ka VAT.
Ki jylla wa ki UT ki wym em pynhiar dor ya ka VAT i Petrol wa Diesel toh ka Maharashtra, NCT ka Delhi, West Bengal, Tamil Nadu, Telangana, Andhra Pradesh, Kerala, Jharkhand, Chattisgarh waka Rajasthan. Ha Lakshadweep, ka sorkar UT da chim phñiang kari ko naka Kerala kawa da dep wow kheiñ chwa ya ka VAT. Katkam wa man kattæ ym em dan Petrol wa Diesel hapoh kani ka UT.
Hadien wa ah ya ka VAT, i heh dooh wa hiar dor i Petrol toh ha Punjab da T. 16.02 chi litre, iwa pynbood da T. 13.43 ha UT ka Ladakh wa T. 13.35 ha Karnataka. I Petrol wa toh dor dooh toh ha Andaman & Nicobar iwa T. 82.96 chi litre iwa pynbood da T. 92.02 ha Itanagar, Arunachal Pradesh. I Petrol da chong dor i T. 117.45 chi litre ha Jaipur, Rajasthan wa T. 115.85 ha Mumbai, Maharashtra.
Heiyatoh wa i Diesel, iwa boon dooh wa hiar dor toh ha UT ka Ladakh iwa hiar da T. 19.61 chi litre, iwa pynbood da T. 19.49 ha Karnataka wa T. 19.08 ha Puducherry. I Diesel toh dor dooh i toh ha Andaman & Nicobar iwa T. 77.13 chi litre, wei T. 79.55 chi litre ha Aizwal, Mizoram. I dor Diesel da man i T. 108.39 chi litre ha Jaipur, Rajasthan wa T. 107.48 ha Vizag, Andhra Pradesh.
Puræ leh: I dor Petrol wa Diesel toh iwa duna dooh ha Meghalaya ha waroh kawi ka ri: Prestone
