U Montri Rangbah ka jylla, u Conrad Sangma ynne ka sngi da pynbna u ya kiwa boon ki tamasa wa daw pynman ha kini ki bnai wow wan chwa ka 21-01-22 kawa man leh ka sngi lyngkhooh dap 50 snem i yoh ya ka jylla Meghalaya.
Da pyntip u wa ha katai ka sngi daw pynman ya ka yalang wa heh ha nongbah Shillong heiwa da khut leh ya u Montri Rangbahdooh ka ri, u Narendra Modi wow embynta lang u kam u kongsan heiwa dang yang yei jubab na ka yung krehkaam yong u Modi.
U Conrad da pyntip u leh wa hadien ka 21 tarik daw pynman ya kiwa boon ki lehkmen ha kylleiñ ka jylla wei daw kynthup lang leh yei sdang ya kiwa boon ki kreh hapoh ka jylla wei daw pynman leh ya ka North East Youth Festival, da pynman leh ya kiwa boon ki yalehke Sports kam ka North East Cup wa kynthup ya ka National Table Tennis Tournament deilang leh waka Meghalaya Games.
Da khana u leh wa ya ka Me•Gong Festival kawa da sdang ynne ha West Garo Hills leh man ko kam chibynta wow sdang yei lehkmen dap 50 snem ka jylla.
Hawa kylli yei daw wa pynman ya kini ki tamasa khamtam heipor wa em ka khlam COVID-19 wei hawa duna poisa ka sorkar, neiliang u Conrad da ong u wa ka khayi pateiñ, i khih i khan yong ki bru chong ko ha kiwa boon ki phang wei ka sorkar da em boon ki kaam wa da leh ko ha ka chnat puræ puthi, ka chnat rep, ha ki kaam uiñke suwari, ki kaam chna sarok wa kiwi de, kamtæ da booh bhah ya ka poisa hawa leh ya iwon iwon i kaam wei lada pynsageh yei chna sarok yow pyndap yeiwa emkaam kawi won ka chnat, daw ktah ko ya ki sarok wei emkaam ya ka sorkar wym toh u leh chilliang deiwa mynjur u wa hap wow pynlut poisa hawa pynman ya kini ki tamasa tangwa da kheiñ yei myntoi wow yoh khamtam ya ki kaam uiñke suwari hadien wa wan ka khlam wei kini ki tamasa leh daw pynyoh kreh ki ya kiwa boon ki bru. Da pynrap u wa emkaam ya ka sorkar wow pait ko leh yaka khlam heijooh i por wow wai laad ya ki kaam uiñke suwari.
Heiyatoh waka Me•Gong Festival, da pyntip u wa daw pynman ya ka man-u-snem.
