U Heiplanmi Lyngdoh, Waheh Chnong ka Lumbangla kawa em ha East Jaiñtia Hills District da ujor u cha u SP ka East Jaiñtia Hills hajrong i chah dat wei chah maham kiwa khoh kaam ka dorbar chnong.
Da ong wa ha ka 02-12-21 heipor 7:45 i miet u S. Sukhlain, u E. Sukhlain, u T. Sukhlain wa u P. Sukhlain da wan ki chapoh ka chnong da kawi ka Gypsy rong lieh wei da dat da bom ki ya kiwa ksohkaam ka dorbar chnong da ki nar-rod wa da ki dieñ.
Ha ini wa jia, u Secretary ka chnong u N. Langchiang da mynsoo joor u wei da kit ya oo cha Hospital katwa kiwi da lait ki khlem da mynsoo deiwa yut chapoh khloo mar ya oo ya ini wa jia wei hadien ini, kini ki soo ngut wa wan dat da maham ki leh ya ka kiwa chong chnong.
U waheh chnong da pyntip u cha u SP wa da e FIR hajrong ini pyn ha ka 4 tarik ha Khliehriat Police Station.
Chooh chooh da pyntip wa ha ka 22-12-21 kini ki jooh ki bru da wan ki da kawi ka Gypsy rong lieh iwa da yoo da kiwa chong chnong heipor 10:00 waje i miet kiwa da rah nar-rod wa kiwi ki tiar pynmynsoo wei da thooh ki ya kiwa kitkaam chnong deiwa maham wow tynpyap ki tangwa ym em chem ki ki.
Neiliang kiwa chong chnong da pisa lyngka ki wa ym em kem ya kini ki bru neibhah hadien ini ha ka 29-12-21 da ujor FIR biang da u waheh chnong ha u Officer In-charge ka Saipung Police Station.
Ha ka ujor da pyntip wa i daw wa da mih ini waroh toh neidaw wa u Waheh Chnong warim, u Milan Paslein da e NOC u cha uwi u bru wa tip kam u Syrpai Sukhlain yow sdang ya ka Coke Factory ha chnong Lumbangla kawa dang em hapoh ka Elaka Nongkhlieh khlem da tip ka Dorbah Chnong wei neiliang ka Dorbar Chnong hajrong ini i daw da pyndam noh ko ya kani ka NOC iwa da pynman ya u Syrpai Sukhlain wa ki bru yong oo wow wan dat ya kiwa mihkhmat ka chnong.
Ka dorbar chnong da pynsñiaw ko leh yei phylla wa kini ki bru wa emkti ha ini i kaam dang yoh ki wow uiñ laitlooid khlem da kem ya ki katwa kiwa chong chnong da im ki dei sier mynsien neibhah kini ki bru ye ki wow wan ha iwon iwon i por wow leh ya ki kaam wa sih yong ki kamtæ da emkaam ya ki pulit wow kem wei wow kset patok ki.
Hajrong ini waroh da kyrpaad ya u SP wow chimkhia u ya ini i kaam.