Ka Meghalaya Human Rights Commission (MHRC) da pyntip ko wa ka chnat i chait i khiah ka sorkar Meghalaya da mynjur ko wow su T. 3 lak cha ka manbei wa dooh hei khon wa dang pun ko hadien waka Ganesh Das Hospital kyntait ko wow pdiang yow wan kha khon ko hapoh kani ka thaw sumaar wei da khut biang ya ka hadien wa wan tuklar da ki seiñbhalang iwa da jia ha u 28-07-2020.
Neiliang ka chnat i chait i khiah ha ka chithi wa da pynmih ha ka 4 tarik uni u bnai da mynjur ko wow su ya kani ka poisa.
Ka MHRC da pynmih hukum ko ha ka 30-07-20 yow phah ko ya u Chief Secretary ka Meghalaya wow pynman ya ka takit hajrong ini wa jia wei wow phah ya ka bui (Report) hapoh 30 sngi.
Hadien wa yoh ya kani ka Report, ka Commission da khut ko ya ka manbei wa kiwa sakhi neiliang yong ka ha ka 11-03-21 yow pynyoo ki ya ki sabut. Neiliang ka Ganesh Das Hospital da phah ya Medical Superintendent deilang wa kiwa sakhi ha ka 19-04-21 heiwa neiliang Medical Superintendent toh wa da chong ngiah ha ka 27-04-21. Hadien wa da pait ya waroh ki sabut wei da yoh wow kylli ya waroh ki arliang da ka MHRC.
Kamtæ ka MHRC da pyntip ko wa deiwa pait ya ini i kaam na waroh ki liang kamjooh yei chah ktah ka manbei kawa da dooh noh yei khon, ka Full Bench ka Commission wa kynthup ya u Chairperson, u Justice T. Vaiphei, ki dkhot ka Commission ka B. Giri wa u P.J.P Hanaman ha ka hukum wa da pynmih ka Commission ha ka 01-11-21 da phah su T. 3 lak cha ka manbei.
Ka Commission da ong ko leh wa ka sorkar ym toh wow pynchitom chooh chooh ya kani ka manbei wow pteiñ yeini i ujor cha kiwi de ki thaw neibhah man ko kawa dooh wei ym yoh poisa ko wow su ya ka bai yaleh mukotduma.
Puræ leh: Khlaad i khonboo hapoh kpoh wa pynslem sumaar ha Ganesh Das Hospital
Puræ leh: Pynche ka sorkar yeiwa khlaad i khonboo ha Ganesh Das Hospital
