Ynne ka sngi, u Montri Rangbah ka jylla, u Conrad K. Sangma da chimbynta u ha ka yalang ka FOCUS kawa man ka Scheme yarap poisa cha ki warep ha ka chnong Dalu, West Garo Hills wa ha Dimapara, South Garo Hills.
Ha Dalu, u Conrad da ekti u ya ki Cheque wa T. 42.10 lak cha ki 50 tylli ki seiñ ki warep namo ki Producer Groups iwa kynjoh ka poisa T. 1.62 klur. Da saam leh T. 36 lak cha ki SHG ha ka SHG Mela lyngba ka Community Investment Fund & Start Up Fund.
Ha Dimapara, South Garo Hills, da saam ya ki Cheque wa T. 82.10 lak cha ki Producer Group ka Gasuapara Block, wow yoh myntoi ki 147 ngut ki warep lyngba ka FOCUS.
U Conrad da ekti u leh ya ki Cheque wa kynjoh T. 82.10 lak cha ki 147 tylli ki Producer Groups kiwa em 1642 ngut ki dkhot.
Ha Dalu da wai leh ya ka Krimkro PRIME Hub, Slaughter Unit & Meat Processing Unit. Da lai pait u leh ya ka Dalu PHC wei da yaklam u wa ki kynthai manbei kiwa wan chah sumaar ha kani ka thaw.
Ha Dalu PHC, u Conrad da ong u wa ka sorkar da yaleh ko wow pynmiat ya ki thaw sumaar lyngba u yoh yarap na ka World Bank.
Da ong u leh wa ka Dalu PHC da emkaam bha u pynmiat ya ka deiwa kular wow leh wow chna pynmiat noh ya ka wei wow booh leh ya ki Staff Quarters wei wow pynheh ya kani ka PHC.
Ha kani ka sngi u Conrad da lai pait u leh ya i kreh ha u sarok Tura – Dalu Road wa da yoh yarap na ka JICA chirup wa ki sahep ka NHIDCL.
