Ka Advisory Committee on Law and Traditional Affairs wa da thung da ka Khasi Hills Autonomous District Council neibynta wow bichaar bniah ya ka KHAD (Khasi Social Custom of Clan Administration) Bill, 2018, ynne ka sngi da ekti ko yei e yumut ha u Chief Executive Member ka KHADC, u Titosstarwell Chyne.
U Chairman kani ka Committee wa kyrpang, u Bindo M Lanong hawa klam ha ki laad pathai khubor da batai bniah u hawa yatoh wa kani ka Bill, wei ka phang pyrdi yong ka Bill man ko kam ka jaitbru Khasi toh kiwa chim jait bait na ka bei ym toh na u pa.
Ha kani ka Bill neiliang yong ka Committee da klam che wa la lada em iwon iwon i chim jait na u pa, ym toh de ki Khasi, wei ini toh ka phang pyrdi yong kani ka Bill, hawa da pynbait bniah leh wow yada nei chah tooh jait ha kiwi won ki jaitbru.
Hawa yatoh i rukom thoh dak, ka Committee da e yumut ko wa hawa thoh dak Khasi ym toh wow pynwan da ka ktien yong kiwi, da khana u leh wa katkam katai ka Bill da chah kyrpang ya kitu ki rukom leh ha Bhoi wow chim jait cha idæ ya kawa tip kam ka ‘Ringbia’ wow yada nei dooh jait.
Ya kani ka Bill da pdiang ha ka yung dorbar yong ka KHADC ha u snem 2018 heipor u HS Shylla, uwa man u CEM warim, tangwa u Lat ka jylla da pynuiñ noh u yaka cha ka KHADC deiwa e lang wa ki yu kylli kiwa da booh lang wei hadien ini ha u snem 2020 da chna ya kani ka Committee wow bichaar bniah biang ya ka Bill.
