U MLA ka All India Trinamool Congress (AITC) na Umroi, u George B Lyngdoh ynne hapoh ka yung dorbar da paan u yaka yutip wa bniah yei yaklam pynbait pood hapyrdi ka Meghalaya waka Assam kawa da lai e leh kam ka bui (Report) cha u Home Minister ka ri, u Amit Shah.
U Montri Rangbah, ka jylla u Conrad Sangma da ong u wa ym ye wow khana bniah iwi pa iwi na ki daw wa boon tangwa ya iwa emkaam da dep u wow khana hapoh ka yung dorbar ini wadep.
Tangwa da ong u iwa da klam wei i ya sñiawthooh waka sorkar Assam toh wa ka Reserve Forest ha Gizang wa Malcapara u em ki hapoh ka Assam hi.
“I khana bniah yeini wa kammon da yabhah wei nadooh neiwon u sdang u pood ym pu ye u ong neibhah ym tip wa lada daw kheiñ nadooh wa kut ka khloo namo deiwa em saka Buffer Zone wa jrong 100 Meter lane hadooh 500 Meter iwa chong katkam wa Ministry of Environment, Forest and Climate Change,” da ong u Conrad.
Da ong u leh wa lada ong u katni neiwon u sdang u pood tangwa ka sorkar pyrdi chim ko da kawi won ka rai kammon wow pynbna ya ka Reseve Forest daw chah pynbaad u wa da yahbakla u ka ka yung dorbar.
Kamtæ da ong u wa na ini i daw kat wym pu rai khaddooh ka Survey of India, ka Assam waka Meghalaya, ka sorkar India leh ym pynbna ko ya u pood hawa yatoh wa kani ka Reserve Forest.
Tangwa neiliang u George da ong u wa em ar jait kawi toh ka soskular Memorandum of Understanding (MoU) wa da soi da u Montri Rangbah ka Assam wa Meghalaya katwa kawi won toh kawa da chem deiwa lai pait hi da ki Regional Committee ha kini ki thaw.
U George da ong u wa iwa chem da iwa lai pait dei khmat dang ye u yang tangwa iwa em hapoh ka soskular toh i wym pu em pynbna paidbah.
U Conrad won da ong u wa iwa dadep pyntip u hapoh ka yung dorbar toh kiwa da chim napoh ka MoU hi.
Da ong u leh wa ki chnat khloo ka sorkar ye ki wow kyntait ya iwa da em hapoh ka MoU wei yei rai heiyatoh wa ini ympu tip kammon.
