Kam chibynta wow yarap pynku ya ki kaam uiñke suwari hapoh ka jylla, u Montri Rangbah, u Conrad Sangma ynne ka sngi hawa wanrah yaka mang tangka 2022-23 da pynbna u chiboon nadooh wow chna ya ki thaw sah wa biang, u wanrah ya ki kari wa syad dor, ki Helicopter wa kiwi kiwi de.
Da khana u leh wa kam chibynta ini, ka Umroi Airport da man ko kawa da krehkaam pura wei ha chi bnai da em hadooh 10,000 ngut ki bru wa pynemkaam ka wa 250 tylli ki lieñsuiñ wa wan wa lai man-u-bnai.
Da pyntip u wa na Umroi da ye wow hær cha 8 tylli ki sor wei daw pynboon chooh ha u snem 2022-23.
Daw booh leh sa ki Helicopter neibynta kiwa uiñke suwari yow lai cha Williamnagar, Dawki wa Sohra. Wei da mang leh T. 101 klur neibynta ka chnat Transport yow ye u leh yeini.
Daw pynkreh leh ya artylli ki Ecotourism Project hei dor wa T. 1,450 klur yow yarap pynmiat ya ki thaw uiñke suwari ha ki 50 tylli ki thaw ha ki 5 snem wa daw wan. Wei kam chibynta ini daw chna leh ya ki thaw sah wa syad dor ha Sohra, East Khasi Hills, Nokrek, West Garo Hills, Mawlyndep, Ri-Bhoi, Siju, South Garo Hills, Nongkhnum, West Khasi Hills, Thadlaskein, West Jaiñtia Hills wa ha Dalmagre, South West Garo Hills.
Heiyatoh wa ki Homestay ka sorkar da e Subsidy ko hadooh 70% yow chna Homestay kiwa chongdor hadooh T. 10 lakh. Ha u snem 2021-22 da yarap ya 100 tylli ki Homestay wei da booh thong 1,000 tylli ki Homestay neibynta u 2022-23 wei ya ini da booh bhah T. 10 klur.
Najrong kini ki thaw sah da ong u wa emkaam leh sa ki kari wei daw wanrah 200 tylli ki kari syad dor deiwa e 50% ka Subsidy cha kitu kiwa kwah wow leh yeini yow thied wei wow pynlai yaw ya kini ki kari.
Daw sdang leh ya ki Electric Bus wa ki e-Buggies ha ki thaw uiñke suwari yow pynsuk yei lai i wan kiwa uiñke suwari.
Kamtæ da ong u wa neibynta ka chnat Tourism da pynku ar chah ya ka poisa deiwa booh bhah T. 173 klur neibynta u snem 2022-23.
