U SP ka East Khasi Hills da pyntip u wa heiyatoh wa iwa jia ha ka 19-11-2021 heipor 9:00 waje i miet heiwa da em ki damok kiwa da psiah chapoh ka Mawkhanu Service Station, Indian Oil (Petrol Pump) wei da sait ki da ka Pistol ya ki arngut ki wakreh kani ka thaw hadooh wa da mynsoo wei da kit ya ki cha NEIGHRIMS yow yoh sumaar.
Ha katai ka miet kini ki damok da yoh ki wow lute T. 2 lak na kani ka thaw wei da yoh ki leh wow yut heiwa yei takit ya ini da leh da ka Diengpasoh Police Station.
Heiyatoh wa ini, ha ka 07-03-22 ki pulit da yoh ki wow kem arngut ki bru wa emkti ha itai i kaam lute kiwa tip pyrtuid kam u Barabor Namsaw uwa tip leh kam u Kyrshan Makri na Police Bazar wei na oo da yoh kem kawi ka thuk-thuk AS-01BH-5342 kawa da pynemkaam heipor wa lai lute ya ka Petrol Pump wa u Bhaijan Warbah uwa na ka chnong Mawkasiang wei na oo da yoh ya kawi ka kari wa em Number ML-10-C-5608. Tangwa u Barabor Namsaw da yoh u wow yut nampoh thanat haka 08-03-2022 heiwa ya ini won da takit da ka Shillong Sadar PS.
Ha ka 22-03-2022 ki pulit ka Shillong Sadar PS wa Nongmynsong OP da yoh biang ki wow kem ya u Barabor Namsaw wa sa uwi uwa tip kam u Khraw Shylla na Nongmensong. Wei kini toh kiwa da emkti wow tooh ya kiwa boon ki thuk-thuk hapoh ka sor Shillong wei ka takit dang lai ko chakhmat.
