U Montri Rangbah ka jylla, u Conrad K. Sangma ynne ka sngi da booh mooyurim u ya ar tylli ki kreh ha Tura wa kynthup ya ka Skill Park & Youth Centre waka Track & Field Stadium.
Ya ka Skill Park & Youth Centre da chna hei lut wa T. 24 klur katwa ya ka madan Track and Field Stadium u chna hei dor wa T. 16 klur. Wei kini waroh ar toh yow pynchlur ya ki khynroo khyllood ha ki kaam yalehke Sports, ki kaam seiñ khih wei wow pynyoo yei sap i tap yong ki.
U Conrad da ong u wa ka sorkar i thmu yong ka toh wow chna u tei ya ki thaw wow bna naam heiwa ka Tura da man ko kam ka chnong wa emkaam ha ri-loom Garo wei da pynkreh ya kiwa boon ki kaam nadooh wow pynmiat ya ka chnong, deiwa wanrah ya ka Smart Town, u pynchna ya ki sarok ka chnong Tura, i chna ya ka PA Sangma Integrated Sports Complex najrong kiwi kiwi.
“Da boon ki snem wa dadep, ki sarok hapoh Tura da chah ieh ki khlem iwon iwon i chna pynmiat. Wei i kam ka sorkar da bahkhlieh i wow pyntikna wa ki sarok hapoh Tura man ki kiwa da pynchna,” da ong u Conrad deiwa pynrap wa ka thong hi toh wow wanrah ya ki kaam pynroi kiwa katkam ka juk katni.
Da ong u wa ka Tura da man ko kawa chah ieh da ki snem wei ka sorkar lyngba ki kreh waphær waphær da booh thong wow pynmiatdur noh ya ka hanla ha ki ar snem wa da lai da pynthut ka khlam COVID-19 tangwa ym em u pyndooh mynsein ko.
U Conrad da pyntip u wa ka P.A. Sangma Integrated Sports Complex daw em ko ya ka madan yalehbol kawa katkam ka juk wa katni, heiwa daw man ko kawi na kiwa miat dooh ha ka thaaiñ mihsngi. Da ong u wa manda dep kani ka kreh wa T. 128 klur daw ye ko wow pdiang ya ki yakhun Football hapoh ka ri kam ka Indian Super League wei da yooluti u wow pyndep noh ya ka ha u Naiynru-Naiynñiaw uni u snem.
Ha kani ka sngi da ekti leh ya ki M-Tab, (Digital Learning Tablet) cha ki khynnah na ki skur kaTura wei da ekti leh ya ki Cheque wa T. 28 lak cha ki 50 tylli ki seiñ ki warep namo ki Producers Group hapoh ka FOCUS.
