U Montri Rangbah ka jylla, u Conrad Kongal Sangma da ong u wa ka jylla ym em u pynkrehkaam ko ya ka ‘Roster’ namo i batai ya i bhah kreh cha ki jaitbru waphær waphær la 50 snem kattu, tangwa da pynlai bait du katkam ka aiñ bhah kreh namo ka Reservation Policy.
Da ong u wa neiliang ka sorkar da chimkhia bha ko yeiwa phah sangeh noh ka High Court ka Meghalaya ya i thung kreh ha ki chnat sorkar wei ynne ka sngi ka sorkar da yaklam kyrpang ko leh yeini ha ka yalang ki Montri (Cabinet).
Chooh chooh da ong u wa neidaw wa ka aiñ bhah kreh em ko ha ki jylla, ha ki 50 snem wa da dep ym em u pynkrehkaam ya ka ‘Roster’, tangwa toh kani ka sorkar kawa da pynkrehkaam nyngkong ya ka ‘Roster System’ neibynta ki bru wa duna ha i doh i pran (Persons with Disabilities) wow yoh ki ya ka bhah kawa 4% ha i thap kreh.
U Conrad da ong u wa kani toh ka phang kawa emkaam bha, wei ka sorkar hap puræ bniah ko wow pynbiang kammon u jubab ya ka kasari lyngba ka dorkhat (Affidavit).
Kam wow kdaw heini, ka High Court Meghalaya ha ka 5 tarik uni u bnai, da pynmih ko ya ka hukum wa ka sorkar jylla toh u pynsangeh noh chwa ko ya waroh i thung kreh hapoh ki chnat kat hadooh wa da pynbna deiwi tawon. Kani ka hukum yong ka kasari wa ha khliehdooh ka jylla toh i daw wa ki chnat krehkaam ym em ki ya ka ‘Roster’ namo ym pynyoo che ki katwon tylli ki kaam wa da mang neibynta ki jaitbru waphær waphær katkam ka Reservation Policy, wei i thung kreh u sdang biang i hadien wa ka sorkar da pynbiang ko ya kani ka Roster System.
