Jowai : Ka ophis yong ka tnat Divisional Forest Officer Jaiñtia Hills (Wildlife Division), da pynem warom ko yaka Wildlife Week ha ka 4 Naichiphaw ha District Library Auditorium Jowai deiwa pynman ya ka yakop Debate, Quiz wa ka Extempore Speech wa da wan chim bynta da ki skur waphær waphær na Jowai.
I thmu u pynem warom ya kani ka Wildlife Week toh chi bynta u pynche cha ki paidbah ha jrong i maa wa yang ya i ki bru ha pyrthai lym ye i u yada ya ki mrad khloo, wei hawa ong u yada ya ki mrad emkaam leh u pynneh pynsah ya ki khloo ki dieñ yow yoh ki u chnong u sah.
Ka phang yong uni u snem kawa ong, “Members Matters: Working Together for Wildlife” toh wa da khut lang ya waroh ki bru samen, ki chnong ki thaw, ki seiñ waphær waphær u kreh lang ki.
Hadien i yakop da em ka yalang wa tbian heiwa u ma G.W.Kharmujai, IFS,Chief Conservation of Forests (Wildlife) da man u kam u kongsan, hei emlang u ma H.H. Mohrmen, ma J.M.Pohsngap, IFS, Divisional Forest Officer, Jaiñtia Hills Territorial Division, ka kong D. Khongiong DSEO West Jaiñtia, kong D.M. Darnei DMC SSA Jowai wa kiwi kiwi wei ya ka yalang da pyllai da ka kong H. Lato, MFS, Divisional Forest Officer, Jaiñtia Hills (Wildlife Division).
Kini ki bru wa heh da pynche ki hajrong i emkaam u yada ya ki mrad khloo nadooh kiwa khian tam, kamjooh u pynneh pymsah yaki khloo ki kjam neibhah e ki boon i myntoi yow bru wei ka pateiñ hadien leh u yoo ki ya ki khloo kamjooh ki mrad wa i yoo i ha kani ka pateiñ.
Da saam leh yaki khusnaam cha kiwa jop ha ki yakop, heiwa yei naam nyngkong ha ka yakop debate da yoh da ka skur North Liberty Higher Secondary School Jowai, wa ar ka Khasi Jaiñtia Presbyterian Synod Mihngi, Higher Secondary School Jowai, wa le won ka Jowai Presbyterian Higher Secondary School.
Ha ka extempore speech yei naam nyngkong wei wa ar da yoh da ki khynnah puræ ka skur North Liberty Higher Secondary School, wa le won ka Panaliar Secondary School.
Ha ka Quiz da yoh nyngkong da ka North Liberty Higher Secondary School, wa ar ka Khasi Jaiñtia Presbyterian Synod Mihngi Higher Secondary School Jowai, wa le won ka Marian Hills Higher Secondary School Jowai.
Ha kani ka sngi ka ophis Divisional forest officer Jaiñtia Hills (Wildlife Division), da pynkup burom haroh ko 7 ngut ki bru wada pyllait im ya ki mrad khloo hapoh Jaiñtia Hills wa kynthup ya u ma Livingstone Dhar na Khimmusniang, u ma Ta Dhar na Wahiajer, u ma Wanshwa Surong na Thangbuli, u ma Russel Nongrum na Ladthalaboh, u ma P. Pdein na Mukhai Ialong, u ma Miyo Lyngdoh na Wahiajer wa u ma Dilonsing Hua na Khimmusniang.
Discussion about this post