U Montri Rangbah warim ka jylla, u Mukul Sangma da tyrwa u wow ah T. 50 lak na ka MLA Scheme yow pynku ya ka tulop kiwa sikai Adhoc kiwa da yakhih la kamwa chi tayaw kattu.
Da ong u wa lada ah T. 50 lak daw ye u pynmih T. 30 klur kamjooh deiwa ah nei dor i bai pynkreh ya kiwa boon ki kreh ka sorkar kiwa da kheiñ syad dor chawa palat.
Da kdaw u leh wa kini kiwa sikai ym em de pynku ya ka tulop ki nadooh u snem 2017 wei ini i dawa ki toh iwa chong yurim.
Kam wow pykynmoo wa ka sorkar da pyntip ko wa ka tulop kiwa sikai Adhoc man ko T. 12,000 chi bnai neibynta kiwa sikai ha ki skur LP, neibynta kiwa sikai ha ki skur UP won ya ki Head Teacher da su T. 18,000, Assistant Teacher T. 16,000 chi bnai, katwa ya kiwa sikai ha ki skur Secondary T. 20,000 chi bnai cha waroh kiwa sikai, wei ini man ko ha waroh ki District ka jylla, wei ka sorkar da pynlut ko T. 181 klur man-u-snem wow su ya i tulop kiwa sikai Adhoc ha ki skur Lower Primary wa Upper Primary.
Yow pynku tulop ka sorkar emkaam poisa ko sa kamwa T. 251 klur neibynta kiwa sikai Adhoc yow pyn ya ryngkat wa kiwa sikai skur sorkar. Wei da emkaam palat T. 500 klur wow pynku ya ka tulop kiwa sikai Adhoc wa SSA hapoh ka jylla.
Ha u Naisaphra 2018 ka sorkar da dep kow wow pynku ya ka tulop yong kiwa sikai skur adhoc na ka T. 6,000 cha ka T.12,000 chi bnai ha ka jylla neibynta kiwa sikai ha ki skur Pre-Primary kiwa em 710 ngut.
