Ka sorkar jylla da chim ko ya ka rai wow pynku noh ya ka yarap poisa cha kiwa sikai skur Adhoc wei ya kani ka rai da mynjur ynnne ka sngi da ki Montri sorkar namo ka Cabinet.
U Montri Rangbah ka jylla, u Conrad K Sangma da khana u wa da mynjur wow pynku noh ya ka mang poisa cha ki skur wei daw sdang u krehkaam nadooh ka 1 tarik uni u bnai, wei ini i rai ka sorkar daw hap wow pynlut pyntam da palat T. 100 klur chi snem, ya kawa daw hap wow khate na kiwi ki chnat sorkar.
Da ong u wa kiwa sikai Adhoc toh ha ki skur ki bru samen namo ki Private School wa yarap ka sorkar da ka poisa Lump Sum wei ka khaddooh wa da pynku ya ka toh ha u Naiynru yong u snem 2016.
Hawa yatoh wa i dawa wow pynku 5% ka tulop man-u-snem, neiliang u Montri Rangbah da khana u wa ka sorkar ym em chim rai ko neibhah kini toh ki Private School wei chong ha ki Managing Committee wow pynbait neibhah ki chim ki ya ka bai skur.
Katkam wa pyntip u Conrad, ka sorkar toh u rai ko wow pynku ya ka tulop da T. 9000 ya kiwa sikai Higher Secondary iwa mut daw yoh T. 33,000 na ka T. 24,000, kiwa sikai Secondary School daw yoh noh ki T. 29000 na ka T. 20,000, kiwa sikai Science na ka T. 22000 cha T. 31,000. Katwa ya kiwi kiwa sikai daw pynku da T. 6000 iwa mut wa ki Lower Primary daw yoh ki T. 18,000 na ka T. 12,000, Upper Primary T. 22,000 na ka T. 16,000, kiwa sikai Hindi T. 18,000 na ka T. 12,000 katwa ki Fourth Teacher da pynku cha T. 18,000 na ka T. 12,000.
