Ka Mihmyntdu Community Social Welfare Association (MCSWA TI CC Khliehriat) chirup i krehlang waka Meghalaya AIDS Control Society (MACS) Shillong, ha kani ka 8 tarik da pynman ko ya ka pynsñiawthooh paidbah ha ka chnong Mookhain, East Jaintia Hill District hajrong ka phang “I sih wa mih nei pynemkaam ya ki jait dih pynmuaid” kamjooh chapang ka kjut HIV/AIDS.
Ya ka yalang ha kani ka sngi da pynlai da u Waheh Chnong ka Mookhain, u Dring Dkhar.
Ki bru wa chemphang wa wan batai ha kani ka sngi toh ka Rinibeth Patlong, Program Manager MCSWA TI CC Khliehriat kawa da batai che chaphrang i sih wa mih nei pynemkaam ya ki jait dih pynmuaid kam i kiad, drugs, bhang wa kiwi kiwi de.
Da ong ko wa kat nang mih ki sngi ki khynnah wa pynemkaam ya ki jait dih pynmuaid dang boon ki, kamtæ man iwa emkaam ya ki bei ki pa u paitbniah bha ya ki khon yong ki yei lai i wan, ki jait lok wa yalok ki wei emkaam bha u paitbniah ki lada ki khon yong ki joor i paan poisa ki khlem tip cheiwon pynemkam ki ka.
Heijooh i por leh kyntu kyrsu ko ya kiwa yahkhmat chnong won man kiwa syndong heiyatoh wa i wan mih wan psiah ki bru kiwa na baar chapoh chnong khlem da tip yei kaam ki.
Ha kani ka sngi da batai leh kammon ktah i drugs yei doh i pran, i bor pyrkhat pyrdaiñ, ya ka imlang sahlang, ka yung ka sem, hei puræ puthi kamjooh leh wot heiyatoh waka aiñ. Da kyntu kyrsu ko lada em iwon iwon kiwa pynemkaam yei dih pynmuaid ym hoi u rieh tangwa u wan chakhmat wow thooh ki laad yarap .
Ka Philia Paslein, Counsellor ICTC Center Khliehriat da batai bniah ko chaphang kammon uni u khñiang poor u na uwi u bru cha uwi, i emkaam u leh yei Test, kammon u pyndooh yei yabi u khñiang HIV naka bei chei khon, wei ym hoi u yoobeiñ ya ki bru kiwa em uni khñiang HIV wa ki laad sumaar.
Da kyntu ko leh ya kitu kiwa em yow khñiang HIV u wan mih ki cha khmat yow dih dawai kamjooh leh ya ki wym dep leh Test leh u wan mih ki cha ki CHC/PHC/Civil Hospital khnang yow tip ki yei man i long yong ki.
Ya ki kyntien khublei da yoh na u Secretary chnong, u K. Dkhar deiwa emlang chirup ki dkhot chnong, ki khon khynroo khyllood wa kiwi kiwi.
Hadien wa dep ka yalang da em leh i leh Screening heiyatoh wa u khñiang HIV/STI wei da saam ya ki kot lakdop wa thoh chaphang ka kjut HIV/AIDS.
