Ki pulit ka North Garo Hills ha ka 10 tarik uni u bnai da kem ki ya uwi u muktiar uwa tip kam u Kunal Kanti Saha Roy uwa na Guwahati, Assam hadien wa chem wa pynemkaam u ya ki kot ki sla wa chna thok.
Uni toh uwa yasaaid aiñ hapoh ka Guwahati High Court heiwa da kem ya oo na Resubelpara hadien wa sai u ya ka hukum yung bichaar wa da chna thok heiwa da pynemkaam u leh ya ka muhor wa da chna thok kamjooh da soi thok leh yei pyrtuid u Judicial Magistrate First Class, North Garo Hills heiyatoh wa ka takit wa da pynman da ka Bajengdoba Police Station.
Heiyatoh wa ini da ujor FIR pyrchah ya uni u bru pyn da u Judicial Magistrate First Class ka North Garo Hills wei da kem ya oo da ki pulit ka Resubelpara PS wei da pynngat ya oo hapoh ka kyndon 465/466/467/468/471/472/34 ka IPC.
Ki pulit ka North Garo Hills hei yahkhmat u Dy.SP da lai kynreh ki yei yung uni u bru ha Guwahati wei da chem chooh chooh ki sabut wa pynemkaam u yow chna ya ka hukum. Uni katni da kset ya oo da ki pulit katwa dang pynman ya ka takit.
