Heiyatoh wa i chah rahbor wei chah tynyap ki arngut kiwa kamai kari Tourist kiwa na West Jaiñtia kitæ u Fullmoon Kharsahnoh wa u Damehipaia Papeng iwa da jia ha uni u bnai, neiliang ki pulit da pyntikna ki wa ki bru wa emkti wow leh yeini toh ki jooh.
Uwi na kiwa yoh kem ki pulit heiyatoh wa ka kaam chah rahbor wei tynyap ya u Fullmoon da yah u leh ya ki pulit yow chem yei metyap u Damehipaia ynnin ka sngi na Neiñchnong, Mihmyntdu hajan ka thaw dai masi.
Heiyatoh wa ini, ki pulit da kem ki ya soo ngut ki bru kiwa da emkti ha kini ki artylli ki kaam pynyap bru wei ya ka takit da leh da ki pulit ka Jowai Police Station.
Kam wow pynkynmoo wa ya u Damehipaia da chah rahbor u ha ka 10 tarik katwa u Fullmoon won toh uwa chah rahbor ha ka 16 tarik heiwa ya u Damehipaia da chem ynnin katwa ya u Fullmoon da chem ha ka jooh ka sngi ka 16 tarik.
Ha waroh ar ini wa jia, kini arngut toh kiwa lai chah khut yow lai Book heiwa ya ki kari yong ki ym em chem de wei da suba toh kiwa da dai cha Assam.
Uwi na kiwa kem ki pulit toh uwa da mih da psiah patok da boonsien uwa da tip pyrtuid kam u I Love You Talang uwa da suba wa emkti hadooh ki kaam pynyap bru nachwa wei da kemlang wa oo ya u Ramesh Dkhar kiwa da yah ya ki pulit chei thaw wa em i metyap u Damehipaia wei hadien ini da kem ya u Tellme Pyrtuh wa u Sampher Ksoo deiwa phla kini ki arngut.
