U Montri Rangbah ka Meghalaya, u Conrad K Sangma ynne da ong u wa ka jylla deiwa wanrah ya ki Scheme wa pynku yei yoh i laa ki warep da pyntikna wa ye ki wow im deiwa yoh nong heiwa da e yarap hadooh ki mrad wa ye ki u ri.
Hawa wan wai ya ka Scheme ri sniang neibynta ki warep kawa tip kam ka “Rural Backyard Piggery Scheme” kawa em hapoh ka National Livestock Mission ha ka yalang wa pynman ha Byrnihat, Ri-Bhoi, u Montri Rangbah da ong u wa ka sorkar lyngba ki Scheme da ye ko wow yarap wow pynku yeiwa yoh nong yow pynim khih ya ki warep.
Da khana u wa ka Meghalaya emkaam ko hadooh 18,000 MT i doh sniang wa hap u wanrah na baar jylla iwa pynyoo katwon duna pynmih doh sniang hapoh ka jylla wei lyngba kani ka Scheme da booh thong wow pyndap yei duna doh.
Hapoh kani ka Rural Backyard Piggery Scheme-Phase-1, ka sorkar da booh bhah ko T. 15.18 klur yow e soo tylli ki khon sniang cha ki 6000 tylli ki manyung.
U Montri Rangbah da ong u wa da booh bhah sa T. 25 klur neibynta ka bhah wa ar namo ka Second Phase kani ka Scheme.
Hapoh kani ka Scheme daw e leh ya ki ram wa khlem sut yow ri wei wow pynheh pynsñgaid ya ki sniang. Da em leh 250 tylli ki Piggery Cooperative Society kiwa da chim ya ka ram kawa dapoi T. 43.67 klur.
Ya kani ka Scheme da sdang nyngkong ha ka 10 tarik uni u bnai ha Samanda Block, East Garo Hills heiwa da saam soo tylli ki khon sniang kiwa 3 tylli ki kynthai wa uwi u chynrang kiwa chongdor T. 25,000 wei daw saam cha ki 6000 tylli ki manyung wa dooh wa duk yow pynku yei pynmih doh sniang hapoh ka jylla.
