Haka lai paidbah namo ka Rally wa khut pynman daka All Jaiñtia Commercial Vehicle Association (AJCVA) ynne ka sngi wada chimbynta lang daki seiñ kamai kari waphær waphær ka Ri-loom Jaiñtia, ki seiñbhalang, ki waheh chnong, ki paidbah, kiwa hayung hasem ki arngut kiwa yah kari kamai wa chah tynyap ini wa dep, ka sur paidbah wa mih na uwa boon wa lang toh i dawa wow pasi ya kiwa emkti khnang wa ka pateiñ chakhmat u chngaaiñ ko.
Yaka Rally da sdang na Iawmusiang, Jowai ter ter u sarok chadooh Laad College deilang wa ki kot rben wa da thoh ya ki kyntien pynrem joor ya kiwa emkti, kamjooh leh i dawa yaki bor yong ka aiñ wow pynchitom deiwa kset patok chi rta wei wow pasi.
Hadien wada poi ha Laad College da em leh ka yalang wa pynlai da u P. Lyngkot, President ka All Jaiñtia Commercial Vehicle Association, wei kiwa chimbynta wow e i klam kynthup ya ki dkhot seiñbhalang waphær waphær, ki waheh chnong, kiwa hayung yong kiwa chah tynyap wa kiwi kiwi.
U ma yong u (L) Fullmoon Kharsahnoh uwa kamai kari wada chah tynyap ini wa dep, da ong u wa kam ka yung ka sem dawa ki yei hok deiwa pasi ya kiwa emkti, neibhah la jia wa yoh laitlooid ki daw sahiar ka chnong ka thaw ka ri waka jaitbru.
Heijooh i por ong u wa lada em kiwon kiwon wa lai bah jamin ya kiwa emkti tynyap, ki leh toh kiwa embynta hei tynyap bru la kiwa hayung hasem næ kiwon kiwon, wei wot ki muktiar wa yasaaid sakhi thok leh da haap lang ki heijooh.
“I kaam ka yung kyrpaad i yaka yung bichaar wow leh ko yei bynta wa emkaam, hao sñiawthooh i wa ka ktien u Blai ong ko wa i tput toh ka yong u Blai ym toh ka yong u bru, tangwa haka imlang sahlang em ki aiñ wa pait yei bha i suk i chngaaiñ waka hok manbru, kamtæ yachim bynta i yow yoh yaka imlang sahlang kawa chngaaiñ nadooh yung kamjooh haka chnong wa ya ka jaitbru,” ong uwa hayung u (L) Damehipaia Papang.
Ong haroh u wa kini kiyi kiyi waroh jia i wot hadooh wow pynkut yei mynsien bru toh wa swe li khih li mylla ki, deiwa thooh laad kamai spah lyngba i tynyap bru.
“Tangwa kynmoo ka spah ka wym dei kamai hok, lane ka spah wa yoh khlem joo chit booh ko hei maa wa khroo,” da pynrap u.
Neiliang u A. Ñiangti, President Synjuk Waheh Chnong Jowai, hawa klam ong u kani da man ka phang wa hap u yakhun wei wanrah ko i pyrkhat ha kiwa chong chnong wa kammon u leh.
Heijooh i por ong u, kawi naki daw wym em de i chongsuk toh i dawbah u drug neibhah wot u chim yei mynsien kiwi leh wym swe de ki tang wow yoh pynhun yei pran.
