Ki khlieh synchaar kiwa haap hapoh i pait ka Khasi Hills Autonomous District Council (KHADC) da rai ki wow kyntu ya ka sorkar wow pynbait ya i pynbna (Notification) wow pynkrehkaam ya ka Criminal Procedure Code (CrPC) wa Civil Procedure Code (CPC).
Ka KHADC da khut yalang ko ya waroh ki khlieh synchaar ynne ka sngi, heiwa da chim ya i rai wow kyntu ya ka sorkar wow pynkylla ya i pynbna.
U Chief Executive Member ka KHADC, u Titosstarwell Chyne da ong u wa ki khlieh synchaar ympu pdiang næ ym hun ki ya ini i pynbna ka sorkar wei da rai ki wow dawa na ka sorkar wow pynkylla biang ya i pynbna namo wow pynmih biang da iwi i pynbna wa che wei yahaap wa i e yumut ki khlieh synchaar wa ya i bichaar ya ki mukotduma ha ki thaw yong ka KHADC daw leh hi da ka kasari ka Council.
U Titos da ong u wa ki khlieh synchaar ha ka yalang da pynsñiaw ki wa lada ka sorkar ym ap ko yei e yumut, daw mih paidbah ki ha ki hima wow pyrchah ya i rai ka sorkar.
