I yaknieh Ticket yong ki kyrtong ka BJP da man iwa joor bha ha 19-North Shillong Constituency, heiwa ha kini ki kajiak tayaw wa dadep 2 ngut ki dkhot wa hakhmat ka BJP na kani ka Constituency da mih noh ki na ka Party hadien wa tikna wa ymyoh ki ya ka Ticket wow yakhun MLA ha u 2023.
Ini i yaknieh Ticket da yoo biang ynne ka sngi leh heiwa neiliang u Michael Kharsyntiew uwa man uwi na ki waheh wa paan Ticket na ka BJP da wan khana u wa u CEM warim ka KHADC uwa man uwa yahkhmat wa rangbah ha ka BJP, u Martamlin Pyrbot da kyrchaan u ya oo wow yoh ya ka Ticket.
Neiliang u Michael da ong u wa ka BJP kyrmen ko hadooh 95% wow jop na North Shillong, wei hadooh katni ympu pynbna yeiyi u e ya ka Ticket, kamtæ da khut u ya kiwa da yut da mih noh wow wan uiñ biang ki cha ka Party.
Da kyntait u leh wa em i yapiah hapoh ka Party neidaw ka Ticket deiwa ong wa em du 3 ngut ki kyrtong kiwa kwah wow yakhun na ka BJP, wei e wa kiwa kyrchaan ka Party u rai ki yeiyi wa toh u yoh Ticket.
Kam wow kdaw heini wa ha ki bnai wa dadep u Rocky Hek da mih noh u wow psiah cha ka NPP wow yakhun na Pynthorumkhrah hadien wa sñiawthooh u wa ymyoh Ticket u na ka BJP wow yakhun na North Shillong. Hadien ini u heh warim uwa man leh u kyrtong ka BJP ha u 2018, u JA Lyngdoh leh da mih noh u na ka BJP, wei katni kamwa sñiawthooh i yaknieh Ticket joor bha i hapyrdi u Michael Kharsyntiew wa u heh pulit warim, u Mariahom Kharkrang uwa dang psiah wot cha ka BJP wow yakhun na North Shillong.
Puræ leh: Psiah BJP u SP warim ka Shillong
Puræ leh: Mih noh u JA Lyngdoh na ka BJP deiwa beiñ ya u Ernest Mawrie
