Kiwa chong chnong ka thaaiñ Labang kam ka chnong Muriap, Murap, Madanmyni, Laher, Mukhim, Umsalait, Mynju, Muknor kiwa haap ha ka Elaka Labang Nangpyllut, Block-I da diaw mynsien wei da sñiawtieñ ki wa kani ka sorkar wa yahkhmat u Conrad Sangma daw lai ko chaphrang wow pynbait ya u pood ha ka kylla wa ar.
Da ong ki wa ha ka kylla wa nyngkong da pynbait ya u pood deiwa dai ya ki thaw ka Meghalaya cha ka Assam wow pynhun ya ka Assam.
Neidaw ini kiwa chong chnong ka thaaiñ Labang kiwa kær soodong da ki chnong Karbi ya boi ki wa u Conrad u dai noh u sa kini cha ka Assam neibhah ki Karbi leh pyrchah bha ki katni ya ka Give And Take Policy heiwa ym chah ki paidbah ka thaaiñ Labang wow lai cha Meghalaya.
“I kam kiwa chong chnong ka thaaiñ Labang la man katwa man ym kwah i wow lai cha Assam,” da ong uwi na kiwa chong chnong.
Da kyrpaad ki leh ya ka sorkar Meghalaya wa Assam wow wan kylli na ki, cheiwon kwah ki wow lai? Lym kamtæ daw man broo ki ha ki Karbi khlem yoh iwon iwon i roi i paar.
Da ong ki leh wa ym em wot ka wi leh ka skur LP na ka jylla næ District na waroh ar jylla, wei wot ki skur Mission leh ym em, ym em ki leh ya ka Job Card ka Scheme na ka sorkar pyrdi wym em wa kwah wow wanrah cha kini ki chnong.
Da kyrpaad ki leh ya ki para jaitbru, ki para kur para jait wa ki seiñbhalang waroh yong ki paaid Ynñiawtrep wow wan hiar cha kini ki chnong wow yoo da ki khmat ya ki dak kammon ka Assam leh ko ya ki.
(Feature Image-File Photo)
