U Symbood Montri Rangbah ka jylla, u Prestone Tynsong sa chisien da e ñia biang u ya u National Spokesperson ka All India Trinamool Congress (AITC), u Saket Gokhale, deiwa ong uyi oo utæ?
Hadien wa klam u Prestone ynnin ka sngi, neiliang u Gokhale da phah biang u ya ka chithi cha kiwa pathai khubor ynne ka sngi deiwa pynneh bait i dawa pynman ya i yakob yataiñia hakhmat kiwa pathai khubor.
Hajrong i pteiñ u Gokhale wow kynthah ya ka sorkar MDA wa yahkhmat da ka NPP, u Prestone uwa man leh u National Vice President ka NPP da ong u wa ka sorkar ym tieñ ko yeiwa kob u, tangwa weileh u lai yakob i wa oo wei iyi man u. Ileh mut u wa sñiaw u lakam wa rap tip u bar ya ki bru kiwa neini.
Da ong u wa ki bru kiwa tip rap bha ya iyi wa jia ha Meghalaya toh ki paidbah ka jylla. Da ong u leh wa u Gokhale toh u pynlut por u wow klam neibynta ka sorkar yong oo ha West Bengal. Da ong u wa u bru uwa khlemkaam ye u wow yakob yania man-ka-sngi.
