Heiyatoh wa i ku ki kaam sih, ki kaam wa dai sarom ha ka imlang sahlang lyngba i pynemkaam bakla ya ki Mobile Phone kamjooh ka Social Media, neiliang ka DSP (HQ) West Jaiñtia Hills, ka Crescency W Lyngdoh da booh ko i kyntu paidbah khamtam ya ki khynroo khyllood wow man kiwa syndong khamtam ki kynthai yow lait nei sñiawsih i sihlet hadien habood.
Da ong ko wa lyngba i pynemkaam bakla ya ki Mobile Phone wow riñ dur khlem akor pyn ya idæ, da jia i chah dai sarom pyn ha ki bru wa chaniah hadien habood.
Da pyntip ko leh wa kitu ki bru wa pynpoor yei Video, i dur yong kiwi khlem da yoh bor na ki tre toh iwa man pyrchah aiñ wei ye ki u chah pynchitom katkam ki kyndon aiñ.
Da ong ko wa katkam ka IPC Section 354(C), i chah pynchitom ya kiwa pynpoor toh 3 hadooh 7 snem deilang ka kuna wa hap ki u su T. 2 lak hadooh T. 7 lak, na ini i daw ong ko wa toh u tip ya ka aiñ khnang hawa leh iwon iwon yow em yei bahkhlieh.
Kyntu haroh ko ya ki khynroo khyllood boi teiñ teiñ sñiaw eh ki u wan ujor cha Police Station heiyatoh wa kam kini ki jait chah ban beiñ, iwa ye u man nei sñiaw sarom, kamtæ ye ki u ujor lyngba ka Website ka National Cyber Crime Reporting Portal deiwa lai ha www.cybercrime.gov.in yow phah ya iwon iwon i ujor lada em ki bru wa pynemkaam bakla yei dur lane i Video.
