Hadien wa poor ka khubor ya iwa jia wa chah siat yap ki 6 ngut heiwa 5 ngut toh kiwa chong chnong ka Mukroh, neiliang ki seiñbhalang kiwa boon na Ri-loom Khasi wa Jaiñtia leh da wan hiar ki cha ini i thaw wa jia.
Ha i janmiet nawon ki seiñbhalang da pynman ki ya ka yalang heiwa da em palat 13 tylli ki seiñbhalang kiwa kynhup ya ka FKJGP, JSU, KSU, HYC, RBYO, HITO wa kiwi kiwi.
Kiwa klam ha kani ka yalang da beiñ ki ya ki pulit ka Assam wa da wan psiah ki hadooh kamwa 6 Km chapoh ka jylla Meghalaya ha Mukroh wow siat yap ya ki san ngut kiwa chong chnong.
Da ong ki leh wa ka sorkar ymtoh u booh wei u pyrchah yei wai yaka Police Outpost ha Barato tangwa emkaam wow booh ya ka ha Mukroh marjan wa ka Mokoilum Police Outpost ka Assam.
Chooh chooh da pyntip wa i yakhih neibynta kini ki san ngut da sdang i heiwa pyn ynne da khang ya ki kari Assam wow psiah chapoh jylla, mynstep nawon u kdoh lama yong ha waroh ki District Headquarter ka Ri-loom Khasi Jaiñtia.
Da dawa ki leh wow kem noh wut-wut ya kiwa emkti wow siat ya kini ki san ngut wei ym sangeh i yakhih kat wympu kem ya ki.
