U Montri Rangbah ka jylla, u Conrad Sangma hawa yaklam wa kiwa thoh khubor ynne heipor wa wan u cha chnong Mukroh wow lai e ya ka poisa yarap kamjooh wow ya syllok wa kiwa ha-yung kiwa khlaad nei chah siat ha ki pulit ka Assam iwa da jia ynnin ka sngi, da ong u wa na kini ki daw wa kamni da emkaam wow pynbait noh ya u pood tangwa kattæ leh dang em bait kiwa pyrchah.
Da ong u wa manda ye wow pynbait ya u pood daw ye u tip wa neiwon cheiwon toh kiwa em hapoh ka jylla tangwa deiwa jia ini daw hap pait deiwa tawon kammon u leh.
Hawa kylli won i leh wa da e du T. 5 lak cha kiwa ha-yung kiwa khlaad hei thaw wow e T. 50 lak, da ong u wa ki kyndon ka aiñ kamwa man kattæ toh wow e yarap T. 5 lak wei lada e pyntam yeini daw hap wow pynkylla ya ki kyndon aiñ wei ini daw chimpor wei manda chimpor leh daw em boon ki wow ong won wa pynslem wow e yaka poisa. Tangwa da ong u wa daw pait kammon u leh yow ye u pynku yaka poisa e yarap.
