Ka sorkar Assam da pynsñiaw ko wa ym em i pyrchah ya ka sorkar Meghalaya wow booh ya ki Border Police Outpost ha ki thaaiñ khappood lada toh ki thaw wa haap hapoh u pood u ang ka Meghalaya.
Ya ini da klam da u President ka BJP Meghalaya, u Ernest Mawrie hadien wa yachem u ya u Montri Rangbah ka Assam u Himanta Biswa Sarma ha Assam Secretariat ynne ka sngi.
Da ong u wa u Montri Rangbah ka Assam da klam che u wa ym em pyrchah u yaka sorkar Meghalaya wow booh ya ki Police Outpost ha ki thaaiñ khappood neibynta wow chngaaiñ wei wow yada ya ki paidbah tangwa ymtoh wow booh ya ki Police Outpost hapoh ka jylla Assam.
Hajrong ini neiliang ki heh ka BJP da pynsñiaw ki ha u Montri Rangbah ka Assam wa toh wow pynchitom ya ki pulit wa ki pulit ka Forest wa siat ya ki bru ha Mukroh, wei da pyntip ki leh wa neiliang u Montri Rangbah ka Assam dadep kyrriah u ya u SP wei da pyndam kreh chipor ya u Officer In Charge wei ym slem ka CBI daw sdang takit ko yeiwa jia ha Mukroh.
Hajrong i dawa ki paidbah wow bichaar hapoh jylla Meghalaya ya kiwa emkti ha Mukroh neidaw wa em ko hapoh u pood ka Meghalaya, neiliang u Mawrie da ong u wa da em i yaklam hapyrdi ki Montri rangbah ka Assam wa Meghalaya wei chong i ha i rai wow chim ki.
