Ynne ka sngi hawa yaklam wa kiwa pathai khubor ha Jowai, hadien wa wai yaka Maternity & Child Health Hospital kawa em ha Panaliar, Jowai neiliang u Montri Rangbah ka jylla, u Conrad Sangma da pdiang u wa em i duna kiwa kreh ha kiwa boon ki chnat sorkar ymtoh du ha Jowai khamtam heiyatoh wa i chait i khiah wa duna Doctor wei duna leh ki Doctor Specialist.
Da khana u wa ha ki soo snem wa da lai da chem chitom bha wow thung kreh ka MPSC khamtam wow thung kreh ya ki Doctor.
Chooh chooh da ong u wa nadooh u snem 2017-18 rap slem chooh chooh i rukom thung ya ki Doctor ha ki kyrdan waphær lyngba ka MPSC neibhah wa da khia kaam ware ko, katwa kamtæ da rai wow phiah ya i kreh wei da sdang noh yaka Medical Board yow ye ko u thung Doctor ha ki kreh wa lait.
Heiyatoh wa i ieh kreh ki Doctor khamtam kiwa lai puræ lyngba ki State Quota, da khana u da em ka Bond yow pyntikna wa kreh ki ha ki thaw sumaar ka sorkar wei katni kani ka Bond man ko T. 50 lak kawa hap ki wow su lada kwah ki wow mih nei kreh waka sorkar.
